25-апрелдиз Докъузпара райондин администрациядин дараматда Афгъанистандин вакъиайра иштиракай ксарив кIвалер маса къачун патал гьукуматди чара авунвай субсидийрал пулар алава хъувунин сертификатар вахкуниз талукьарнавай мярекат кьиле фена. Ана райондин кьил Мегьамед Шамилова ва агьалияр яшайишдин рекьяй хуьдай управленидин (УСЗН) начальник Эсед Арабова иштиракна.

Мярекат ачухдайла, Мегьамед Шамилова, Афгъанистанда кьиле фейи дяведа иштиракай ксарихъ элкъвена, чими келимаяр лагьана, фадлай вилив хуьзвай шад ва­­къиа тебрикна, дяведи рикIера сагъ тежедай гзаф хирер турди къейдна­.

Райондин кьили 3 касдив сертификатар вахкана. Абурун арада Миграгъай тир Кебир Биллаевни Бейдуллагь Гьасанов, Усугъчайдилайни Завидин Магьмудов авай. И юкъуз сертификат Усугъчайдал яшамиш жезвай I группадин инвалид Наира Теминдаровадивни вахкана.

М.Шамилова шад мярекатдин иштиракчийрихъ сагъвал ва уьмуьр­да агалкьунар хьун алхишна. ГьакI­ни райондин кьили Да­гъус­тандин регьбер Сергей Меликован тIварцIихъ разивилин келимаяр лагьана, гьикI хьи, республикадин кьиле акъвазайвалди ада и месэла вичин гуьзчивилик кутуна ва гьялна. Чими келимаяр Докъузпара райондин УСЗН-дин начальник Эсед Арабован тIвар­цIихъ­ни ла­гьана.

* * *

И юкъуз Мегьарамдхуьруьн райондин кьил Фарид Агьмедовани Афгъанистандин дяведин иш­тиракчи, Къуйсундал яшамиш ­жезвай Эльман Билгьасанович Агъасиевав кIвалер маса къачун патал гьукуматди чара авунвай субсидиядин кьве шагьадатнама (санлай 1 681 488 манатдин кьадарда аваз) вахкана. Адан ва хизандин уьмуьр­да лишанлу вакъиа тебрик авунихъ галаз сад хьиз, райондин кьили ветерандихъ мягькем сагъламвал ва хушбахтлувал хьун алхишна.

— Чи ватанэгьлийри Ватандивай яргъа чпин аскервилин буржи ла­йихлудаказ кьилиз акъудна. Къенин юкъузни чи жегьилри Украинада кьиле тухузвай военный махсус серенжемда игитвал, дирибашвал, уьтквемвал къалурзава, Россиядин итижар хуьзва. Махсус серенжемда чи гзафбурун багърийри, мукьва-кьилийри иштиракзава. Чна абурун тереф лап вини дережада аваз хуьн лазим я, — лагьана  Ф.Агьмедо­ва. Ада гьакI чи гьукуматдини абу­рун игитвал фикир тагана тун тавурди къейдна.

Вичин нубатдай яз, Э.Агъасиева куьмек гунай властдин вири къурулушриз, райондин муниципалитетдиз сагърай лагьана. Мярекатда райондин УСЗН-дин директордин заместитель Камил Алиева ва администрациядин жавабдар къуллугъчийрини ишти­ракна.

«Лезги газет»