Ахцегьа бинеламиш хьанвай 2354 “б” нумрадин погранкъуллугъда 2017-йисалай инихъ ветеранрин совет кардик ква. И тешкилатдин председателвиле ва адан заместителвиле погранкъуллугъдин ветеранар тир Назим Сардаровни Алаудин Къазиев тайинарнава. Погранкъуллугъдин советдин ветеранриз-сергьятчийриз яшайишдин жигьетдай герек тир куьмекар гузва, школайра аялар ватанпересвилин руьгьдаллаз тербияламишунин карда иштиракзава.
И советди вичин кIвалах махсус пландин бинедаллаз тешкилзава. Советдин членри школайра кIелзавай аялриз ва гьакI армиядин жергейра контрактниквиле къуллугъиз кIанзавай жегьилриз рекомендацияр кхьизва, абурухъ галаз ватанпересвилин тербиядин рекьяй серенжемар кьиле тухузва. Пог-ранкъуллугъ тешкилайдалай инихъ 100 йис тамам хьунин юбилейдиз талукь яз кьиле тухвай мярекатда ветеранри активвилелди иштиракна.
2018-йисан октябрдин вацра ветеранри погранкъуллугъдин кьегьал прапорщик Ф.Максумов лайихлувилелди эхиримжи сефердиз рекье хтуна. Алай вахтунда сергьятчи ветеранрин Советди Докъузпара ва Рутул районра авай гьа ихьтин тешкилатрихъ галаз саналди тир кIвалахдин план туькIуьрнава. Идани кьиле тухузвай серенжемар са мураддихъ рекье твадай мумкинвал яратмишда.
Рагьидин Эминов
