“Дербент район” МР-дин кьил Мегьамед Желилова райондин агьалияр кьабулна. Администрациядин пресс-къуллугъди хабар гайивал, и сеферда чпин дердияр гваз атанвай инсанрин кьадар лап гзаф тир.
Вучиз икI хьана лагьайтIа, Кьиблепатан Дагъустанда кардик квай телеканалрай, социальный сетрай ва гьакI райондин кьилин интернетда авай аккаунтдани Дербент райондин кьили агьалияр кьабулзавайдакай хабарар ганвай.
Экуьнилай нисиналди давам хьайи гуьруьшда М.Желилова виридан дердийрихъ яб акална. Агьалийрин чIехи паюни (женгчи гьерекатрин ветеранар, набутар, гзаф аялар авай ва кесиб хизанрин векилар) чпиз чилерин участокар чара авунин, абур учетдиз къачунин гьакъиндай тIалабна.
Са шумуд касди чеб кIвалах авачиз амукьнавайдакай шикаятна. Гьелбетда, райондин кьиливай куьмек кIанзавай виридан дердияр гъиле-гъилди туькIуьриз хьанач. Бязи месэлаяр М.Желилова вичин гуьзчивилик кутадайди ва абур гьялиз куьмек гудайди хиве кьуна.
Гуьруьшда райондин администрациядин вири отделрин руководителри, хуьрерин администрацийрин кьилери иштиракна.
«Лезги газет»
