8-июндиз Россиядин Федерациядин оборонадин министр Сергей Шойгу Дагъустандиз атана. РД-дин Кьилин везифаяр вахтуналди тамамарзавай Сергей Меликовахъ галаз санал уьлкведин военный ведомстводин регьберди Каспийск ше­гьерда цин винелай фидай гимияр бинеламишдай пункт эцигунин кIвалахар ахтармишна. Идан гьакъиндай “Лезги газетдиз” Дагъустандин Кьилин пресс-къуллугъди хабар гана.

Гимияр акъвазардай чка эцигна куь­тягьайла, “Каспий” пунктуна 50-далай ­ви­низ женгинин гимияр гьакьда. Йисан эхирдалди гимияр бинеламишдай пунктуна абур лепейрикай хуьдай банд эцигна куьтягьда. Ам 1,2 агъзур метрдин мензилдиз ва ахпа 2,6 агъзур метрдин мензилдиз яр­гъи жеда. Алай вахтунда Кеферпатан ва Кьиблепатан бандар эцигна куьтягьнава.

Каспийскдин флотилиядин имаратар авайдалай хъсанар хъувунин гьакъиндай къарар РФ-дин оборонадин министерстводи 2017-йисан августдиз кьабулнай. Адан бинедаллаз, стратегиядин жигьетдай лап къулай чкаяр тирвиляй, Каспийскдин фло­тилиядин бинелу пунктар Каспийск ва Махачкъала шегьерра жеда.

Дагъустандин Кьил Сергей Меликовахъ галаз Сергей Шойгу 137-отряддин цин кIаникай гьужумдай къуватрихъ ва маса шейэрихъ галаз женг чIугвадай ксар гьазурзавай базадиз фена. Мугьманар гьуьлуьн спецназдин векилар барокамерра ва лап дерин гьавизда ахтармишзавай гьалдиз килигна. Спецназдин аскерри цин кIаник фидайвал, це какахьай ва чукIул­рин женгера иштиракзавайвал, гимийрал эцигзавай хъиткьиндай шейэр жагъурдайвал ва цин кIаник лишанар ядайвал къалурна.

Сергей Шойгуди махсус центрадин пешекаррин фикир ина вердишарзавай гьар са аскердин къилихар, алакьунар, сагъламвал чирунал ва гьар са касдихъ галазни, и ерияр фикирда кьуна, кIвала­хунал желбна. ГьикI лагьайтIа, спецназдин­ аскерар вири рекьерай гьазурвал авайбур хьана кIанда, — къейдна С.Шойгуди.

Каспийскда авай вахтунда  министрди во­енный городокдин яшайишдин месэлайризни кьетIен фикир гана. Ам Сергей Меликовахъ галаз санал вертолетдай Каспийскдин флотилиядин объектар алай ва эцигунар кьиле физвай чкайриз килигна.

Уьлкведин военный ведомстводин регьбердиз малумарайвал, мукьвал вахтара Каспийскда аялрин кьвед лагьай бахча ва 1200 аял гьакьдай школадин да­рамат ишлемишиз вахкуда. Гъилевай йисуз шегьер­да военный къуллугъчияр патал 528 квартирадин кIвалер ишлемишиз вахкана. И районда аялрин бахча, туьквенар ва банкдин отделение кардик кутунва.

РФ-дин оборонадин министрдин за­мес­титель Тимур Иванова хабар гайивал, ми­нистерстводин къаюмвилик кваз регионда 16 школа (9 агъзур аялдин чка) ва 57 бахча (9 агъзур аялдиз) эцигдайвал я. Адан гафаралди, “Демография” ва “Образование вилик тухун” милли проектрин, государстводин программайрин бинедаллаз Дагъустан Республикада яшайишдин метлеб авай 73 объект эцигда. Абурук ви­нидихъ къейднавай школаярни, аялрин бахчаярни, яслиярни акатзава. Фикирдик квай крар кьиле тухун патал къенин йи­къал­ди 71 икьрар кутIуннава. Са шумуд икьрар алай йисан пуд лагьай кварталдани кутIун хъийида.

Сергей Шойгу Сергей Меликовахъ галаз Каспийскдин “Дагдизель” заводдизни фена. Абуру коллективди государстводин оборонадин заказар кьилиз акъудзавай гьал ахтармишна.

Къейд авун лазим я хьи, карханади ВМФ патал цин кIаник ишлемишдай яракьар гьазурзава, гьакI — промышленностдин ва гимийриз герек къведай дизельный двигателар, дизельный электростан­цияр­ни. Абур гьуьлуьн ва кьураматдин шар­тIарани ишлемишиз жеда.

Карханадин генеральный директор Владимир Дудчака военный ведомстводин регьбердиз заводдин производстводин къуватрикай, такьатрикай ва гележегдин планрикай ихтилатна. Ада мугьманар цехриз тухвана, абуруз  акъудзавай продукция къалурна.

“Дагдизель” завод дизелар ва торпедаяр гьазурзавай Россиядин куьгьне карханайрикай сад я. Ам “Концерн “Морское подводное оружие — Гидроприбор” АО-дин къурулушдик  ва “Тактическое ракетное вооружение” корпорациядик акатзава.

РФ-дин оборонадин министр Сергей Шойгу Дагъустандиз атунин гьакъиндай РД-дин Кьилин везифаяр вахтуналди тамамарзавай Сергей Меликова вичин фикирар лагьана. Адан гафаралди, Каспийскдин флотилия патал яшайишдин объектар эцигун — им республикадин инфраструктура санлай вилик тухузва лагьай чIал я. “Чна ипподромдин районда аялрин­ мад са бахча эцигун гъиле кьазва. И проектдин гьакъиндай РФ-дин оборонадин министерстводи чпин теклифарни гудайвал я…”, — лагьана С.Меликова.

«Лезги газет»