Ватандин Игитрин югъ къейд авур 9-декабрдиз Сергей Меликова Махачкъаладин 54-нумрадин юкьван мектебда, «Разговоры о важном» проектдин сергьятра аваз, ачух тарс кьиле тухвана.
«Зун квехъ галаз гуьруьшмиш хьунал рикIивай шад я. Вични къе — Ватандин Игитрин сувар къейдзавай юкъуз. И югъ къейд ийиз цIи цIерид лагьай йис я. За квез виридаз и чIехи сувар мубаракзава», — лагьана Сергей Меликова гуьруьшдин эвел кьиляй, аялрихъ элкъвена.
Тарсунин сергьятра аваз республикадин Кьили и сувар арадал атунин тарихдикай суьгьбетна ва къведай йисуз чи уьлкведи ЧIехи Гъалибвилин 80 йис шад гьалара къаршиламишдайди къейдна. Ихьтин вакъиайрихъ чи Ватан, халкь патал авай метлебдикай, ватанпересвилин тербиядикай, акьалтзавай несилри чIехи бубайрин баркаллу крар давамаруникай итижлу ихтилатар авуна. Украинада кьиле физвай дяведин махсус серенжемда игитрин-дагъустанвийрин кьегьалвилерни къейдна, абур чешне къачуниз лайихлу къагьриманар тирдакай лагьана.
Эхирдай Сергей Меликова аялрин суалриз жавабар гана.
Агьмед Магьмудов
