Махсус серенжемдикай
РФ-дин оборонадин министерстводи 16-январдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 372 самолет ва 200 вертолет, зенитный ракетайрин 401 комплекс, пилот галачиз лув гудай 2885 аппарат, 7537 танк ва дяведин маса машинар, РСЗО-дин 983 машин, артиллериядин ва маса 3841 яракь, военный махсус 8066 автомашин тергна.
Стаж 2 кьадардинди яз гьисабда
Россияди Украинада кьиле тухузвай военный махсус серенжемда иштиракзавай аскеррин муддат абурун страховой стажда кьве кьадарда аваз къалурда. “Новости” РИА-дин малуматралди, ихьтин къарар уьлкведин гьукуматди акъуднава.
Къейд ийин, къарар СВО-да иштиракзавай вири аскерриз талукь я: тамам тушир мобилизациядин сергьятра аваз, икьрардин бинедаллаз ва гуьгьуьллувилелди къуллугъзавайбурузни.
Идалайни гъейри, мобилизациядик акатай карчияр къуллугъ тамамарзавай муддатда статистикадин гьахъ-гьисабар гуникай азаднава. Гьукуматдин “Мобилизация авунвайбуруз куьмекар гунин серенжемрин гьакъиндай” къарардик документдалди дегишвилер кухтунва.
Министррин кабинетди къейднавайвал, и къарар мобилизациядик акатнавайбуруз ийизвай алава куьмекрикай сад я. РикIел хкин, Россияда тамам тушир мобилизация 2022-йисан 21-сентябрдиз малумарнай ва гьа йисан октябрдин эхирра адан серенжемар акьалтIарнай. Санлай къачурла, запасда авай 300 агъзур аскердиз Яракьлу Кьушунриз эвер гана.
Вилик пад кьуна
Севастополдин ва ЧIулав гьуьлуьн флотдин ПВО-дин системади гьуьлуьн винел ягъай пилот галачир аппаратрин кьадар иридав агакьнава. Идакай Севастополдин губернатор М.Развожаева телеграм-каналда хабар гана.
“Шегьердин ва патарив гвай мулкарин гьич са объектдизни зарар хьанач. КьетIендаказ къейдзава: пилот галачир вири аппаратрин вилик пад гьуьлуьн винел кьуна”, — кхьенва ада.
Губернатордин гафаралди, Киевда нетижасуз гьужумар нубатдин агалкьунар хьиз къалуриз алахъзава. “Гьавада гуьзчивал тухун давам жезва. КьетIен гьаларин вири къуллугъар гьазур я”, — анжах официальный малуматрихъ инанмиш хьун герек тирди рикIел хкуналди, алава хъувуна ада.
Алай йисан сифте кьилерилай Киевди Крымдал са шумудра дронрин куьмекдалди гьужумар авуна. Вири алахъунар гьакIанбур хьана.
Танкар гун кьетIнава
Польшадин премьер-министр М.Моравецкийди вич Германиядин сиясатчийрихъ галаз гуьруьш жез фидайдакай ва Киевдиз танкар ракъурун патал абур алакьардайдакай малумарнава.
“Новости” РИА-ди хабар гузвайвал, алатай гьафтеда Польшадин президент А.Дудади, Львовда авайла, международный коалициядин сергьятра аваз Украинадиз “Leopard” танкарин рота ракъурда лагьанай. Ихьтин коалиция арадал гъуник кьил кутунвайди Польша я.
Канададивайни тIалабда
В.Зеленскийдиз Канададин премьер-министр Д.Трюдодивай “Leopard 2” танкар тIалабиз кIанзава. “Новости” РИА-ди хабар гузвайвал, идакай маса изданидиз гайи интервьюда Украинадин президентдин офисдин кьил М.Подоляка малумарна.
Адан гафаралди, арада дуствилин хъсан алакъаяр авайвиляй Зеленскийди Канададин премьер-министрдивай залан танкар гун тIалабда. “Бронетехника ракъурунин сифте кам Германияди къачун герек я, гьикI лагьайтIа, технологиядин сагьиб и уьлкве я”, — лагьана ада.
Мажбурнамаяр тамамарнавач
Туьркиядин милли оборонадин министр Х.Акара малумарнавайвал, Швециядини Финляндияди НАТО-дик экечIунин жигьетдай Анкарадиз хиве кьур мажбурнамаяр кьилиз акъудзавач. Идакай “Новости” РИА чешмеда кхьенва.
Къейд ийин, алай вахтунда Швецияни Финляндия альянсдик экечIунин кар 30 уьлкведикай анжах кьведа тестикьарнавач – Венгриядини Туьркияди.
Санал машинар туькIуьрда
Иранди Россиядихъ галаз санал автомобилар туькIуьрдай тешкилат арадал гъун мумкин кар яз гьисабзава. Ихьтин фикир “Новости” РИА-диз Ирандин промышленностдин, мяденрин ва алишверишдин министр О.Галибафа лагьана.
Адан фикирдалди, автомобилар арадал гъидай уртах завод Иранда ва я Россияда ачухун абур агалкьунралди маса гуз хьунихъ галаз алакъалу я.
«Лезги газет»
