Мукьвара интернетдин соцсетра пайда хьайи са видеороликди вичел парабурун фикир желбна. Анай аквазвайвал, туьквендай недай-хъвадай няметар маса къачур муьштериди кассирдин кьилел къаймах авай къаб гадарна. Себеб ам тир хьи, кассирди муьштеридиз медицинадин маска алукIун теклифнавай.

Им, лезги мисалда къалурнавайвал, “хъел атайла, акьул катда” лугьудай дуьшуьш я. Вич кьиле тухунин жигьетдай тафаватлу хьайи муьштеридиз соцсетра инсанри жуьреба-жуьре баянар га­на. Гьарда вичиз кIани гафар кхьена. “Кассирдик вуч тахсир ква, ада ви­чивай истемишзавайвал кIвалах­зава ман”, — кхьизва сада. Са масада “коронавирусди инсанрин зегьле ракъурзава, ада инжиклу ва сабурсуз ийизва” хълагьна. Тамамдиз гьахълу яз гьисабиз жедай, эгер гьа “зегьле ракъуруни”, “сабурсузвилери” крар туькIуьрзавайтIа. “Кьегьалвал” къалурай муьштери гьахълудаказ меземмет авурбурун, адаз туьгьметдин гафар кхьейбурун кьадарни тIимил хьанач.

ТIугъвалдихъ галаз алакъалу гьакъикъат масад хьуни туьнтвилериз, шулугъчивилериз рехъ гун эсиллагь виже текъведай гьерекатар тирди къалурзава.

Пешекаррин фикиррал, ахтармишунрал бинеламиш хьана тайинарнавай сергьятвилер-къадагъаяр гьисаба такьунин барадай дагъустанвиярни кIвенкIве жергейра ава. Тайинарнавай къайдайрал амал тавунихъ галаз алакъалу жуьреба-жуьре мисалар хейлин гъиз жеда. Бязи вахтара вуна акI фикирда хьи, инсанри чпи чеб алцурарзава. Вирибурун рикIел алама жеди, тIугъ­валдин девирдин эвел кьилера коронавирус садакай масадак акатунин хаталувал авай “чешмейрикай” сад жемиятдин улакьар тирди малумарнай. ТIебии я, им инкар ийиз ва я шак гъиз жедай карни туш. Кьва­тида авайбур хьиз, арада талукь мензил авачиз  ацукьзавайвиляй улакьра инсанрикай садакай масадак вирус акатунин къурхулувал екеди я. ИкI тирди чизва. Амма серенжемрал амал ийизвач. Вучиз? Къариба аквазвай кар ам я хьи, улакьрин (микроавтобусрин) вилик пата ацукьзавайбурувай водителри гьасятда маска алукIун истемишзава, муькуь пассажирриз са чуькьни ийизвач. Рекьера гьалтай полициядин къуллугъчийриз маскаяр алачиз акуртIа, жерме ийидайди чиз­ва. Яни коронавирус акатунин вилик пад кьунин серенжем яз ваъ, жермедикай хуьнин амал яз маска алукIун истемишзава. Гьакъикъатда им фендигар амал я. Улакьчийри полициядин къуллугъчияр, постар алай чкайрилай алатайла, чинилай маска ахлудзава. Са гафу­налди, серенжемар  ягьанатриз элкъуьрзава.

Аквазвайвал, ковид туьнтвилеризни такабурлувилериз табий жедай затI туширди гьеле аннамиш та­вунвай ксарни ама. Идакди нетижаярни нагьакьанбур жезва. Да­гъус­танда и мукьвара са йикъан къене пуд вишелайни гзаф вирус акатай дуьшуьшар винел акъуднава. ЦIийиз пайда хьанвай “омикрон” штамм мадни йигин еришралди гегьеншдиз чкIизвай жуьре яз гьисабзава.

Малум тирвал, коронавирусдин фендигарвал адакай ибарат я хьи, и азардин судур вилив техвей хьтинди жезва. Вирусдик начагъ хьана сагъ хъхьайбуру тестикьарзавайвал, ковиддилай кьулухъ бязибурун вилерин экв зайиф жезва, садбурун рикIиз таъсирзава, санлай бедендик са гьихьтин ятIани цIийи нукьсан акатзава.

К.Ферзалиев