Алай йисан 20-январдиз Кьасумхуьрел “Зи рикI алай шаир” лишандик кваз 2020-2021-кIелунин йисуз Сулейман-Стальский райондин умуми образованидин идарайра 4-5-классра кIелзавайбурун арада тухвай ахтармишдай кIвалахдин муниципальный конкурсдин нетижаяр кьуна.
Абдул Саидован тIварунихъ галай Эминхуьруьн юкьван школадин 4“б” классдин ученица Селминат Кьасумовади лезги поэзиядин классик Етим Эминан яратмишунрикай кхьей кIвалах (сочинение) конкурсда 2-чкадиз лайихлу хьана. Селминатаз райондин образованидин управленидин начальник Гьуьсейн Шихбабаеван къул алай грамота гана.
Лагьана кIанда, С.Кьасумовадихъ цIинин кIелунин йисуз жуьреба-жуьре хилерай муниципальный конкурсрин школадин паяра 1-3-чкаяр кьунай ганвай 3 грамота мадни ава.
С.Кьасумовади вири тарсарай анжах хъсан къиметар аваз кIелзава, школадин общественный уьмуьрда активвилелди иштиракзава. ИкI, Селминат 4“б” классдин староста, классда кардик квай КВН-дин командадин капитан, школадин художественный самодеятельностдин иштиракчи я. Адан шикил “Абурал чна дамахзава” стендда ава.
— Селминат неинки чи классда, санлай школада гьам кIелунин, гьамни ахлакьдин рекьерай чешнелу аялрикай сад я, — лугьузва классдин руководитель Милана Агъабалаевна Селимовади. — Гьавиляй адаз муаллимрин ва кIелзавайбурун арада гьуьрметни ава.
Марсель Бабаев
