20-февралдиз Махачкъалада Дагъустандин авторрин эсерар хайи чIаларал кIелунай республикадин конкурс кьиле фена. Ана 41 райондайни шегьердай 11-классра кIелзавай 94 аялди иштиракна.

Дагъустандин образование вилик тухудай институтдин филологиядин образованидин кафедрадин къуллугъчи Нагима Таймуровади чи газетдиз хабар гайивал, лезги шаиррин шиирар кIелайбурун арада Дербент, Махачкъала, Каспийск шегьеррай ва Ахцегь, Мегьарамдхуьруьн, Сулейман-Стальский, Кьурагь, Хив, Дербент районрай атанвай 9 аялди иштиракна.

Абуруз Нагима Таймуровади, ДГПУ-дин муаллим, филологиядин илимрин кандидат Фаина Къазимегьамедовади ва Дагъустандин писателрин Союздин лезги секциядин регьбер Владик Батманова къимет гана.

Нетижада 1-чкадиз Дербент шегьердин 15-нумрадин юкьван мектебдин ученик Амир Эмиров лайихлу хьана. 2-чка — Кьурагь райондин Аладашрин хуьруьн мектебдин ученица Эсмира Рамазановади ва 3-чкаяр Мегьарамдхуьруьн райондин Ярагъ-Къазмайрин мектебдин ученица Камилла Гьабибовадини Махачкъала шегьердин 37-нумрадин гимназиядин ученица Камила Рамазановади кьуна.

Гъалибчийриз Дагъустандин образованидин ва илимдин министерстводин патай дипломар гана.

Агьмед Магьмудов