Алай йисуз гьам уьлкведин, гьамни Дагъустандин сиясатдин уьмуьрда кьиле фейи лишанлу вакъиайрикай сад сечкияр я. Тарихда сифте яз Госдумадиз ва РД-дин Халкьдин Собранидиз депутатар хкягъун патал тешкилай сечкияр пуд юкъуз давам хьана.
Госдумадиз Дагъустандин патай 8 депутат хкянава. Абурун арада виликан депутат Мурад Гьажиев, РФ-дин Президентдин патав РД-дин Гьамишалугъ векилдин везифаяр тамамарай Жамаладин Гьасанов, Дербентдин виликан мэр Хизри Абакаров, РД-дин Кьилин меслятчи Сайгидпаша Умаханов, Сергокъала хуьруьн юкьван мектебдин директор Нурбаганд Нурбагандов, Росгвардиядин Кеферпатан Кавказдин Управленидин командующийдин заместитель Абдулгьаким Гьажиев, ОНФ-дин исполкомдин регьбердин заместитель Артем Бичаев ва “Трезвая Россия” проектдин сагьиб Султан Хамзаев ава. Эхиримжидав РД-дин Кьилин везифаяр вахтуналди тамамарзавай Сергей Меликова вичин мандат вахкана. И сеферда Госдумадин депутатар хьанвай дагъустанвийрин арада чи миллетдин векил авач.
Къейд ийин хьи, мад кьве дагъустанвидикай Урусатдин маса регионрин патай Госдумадин депутатар хьанва: Ризван Къурбанов — Башкириядин, Руслан Гьажиев — Татарстандин.
Дагъустандин Халкьдин Собранидин депутатар яз чи халкьдин векилрикай 13 кас хкянава. Сергей Меликова вичин мандат — Марина Котенкодив, Ахцегь райондин кьил Осман Абдулкеримова Мегьамед Алихановав вахкана. Сулейман Керимов нубатдин сеферда Федерациядин Советда Дагъустандин патай сенатор яз хкя хъувуна. Алай вахтунда РД-дин Халкьдин Собранидин депутатрин арада 11 кас лезгияр ава. Агъадихъ чна газет кIелзавайбуруз абурукай куьруь малуматар гузва:
Абдулхаликьов Самир Кьасумович — КПРФ-дин ЦК-дин, КПРФ-дин рескомдин Бюродин член, КПРФ-дин Дагъустанда авай отделенидин сад лагьай секретарь, Дагъустандин Избиркомдин член. Ам Кьурагь райондин КIирийрин хуьряй я.
Алипулатов Ильман Субгьанович — машгьур журналист, ДГУ-дин электронный СМИ-рин кафедрадин заведующий, РД-дин здравоохраненидин министерстводин жемиятдин советдин председатель. “Справедливая Россия” партиядин член. Ам Мегьарамдхуьруьн райондин Гарагърин хуьряй я.
Алиханов Мегьамед Магьмудович — РД-дин милли сиясатдин ва динрин крарин рекьяй министерстводин къецепатан уьлквейра авай ватанэгьлийрихъ галаз алакъаяр хуьнин жигьетдай кардик квай ведомствойрин уртах советдин председатель. “Единая Россия” партиядин член. Дербент шегьерда дидедиз хьана. РД-дин Халкьдин Собранида Ахцегь райондин патай депутат я.
Велимурадов Мусафенди Абдулмежидович — жемиятдинни сиясатдин машгьур деятель. Хейлин йисара Мегьарамдхуьруьн райондиз регьбервал гана. Жуьреба-жуьре йисара Кьиблепатан Дагъустанда РД-дин Кьилин патай тамам ихтиярар ганвай Векилдин, РД-дин хуьруьн майишатдин ва суьрсетдин министрдин везифаяр тамамарна. “Единая Россия” партиядин член. Мегьарамдхуьруьн райондин Чахчахрин хуьряй я.
Къарибов Анатолий Шамсудинович — жемиятдинни сиясатдин машгьур деятель. Гзаф йисара республикадин сад лагьай вице-премьер яз кIвалахна. Жуьреба-жуьре йисара РД-дин туризмдин рекьяй кардик квай Агентстводиз регьбервал гана, республикадин культурадин, жегьилрин крарин рекьяй министрдин заместителдин везифаяр тамамарна. “Единая Россия” партиядин член. Махачкъалада дидедиз хьана. РД-дин Халкьдин Собранида Кьурагь райондин патай депутат я.
Керимов Сулейман Абусаидович — жемиятдинни сиясатдин машгьур деятель, карчи, меценат. Виликдай Госдумада III ва IV созыврин депутат тир. 2008-йисалай Федерациядин Советда Дагъустандин патай сенатор я. “Единая Россия” партиядин член. Докъузпара райондин Къаракуьре хуьряй я.
Магьмудов Магьмуд Гьажулаевич — жемиятдинни сиясатдин машгьур деятель. Хейлин йисара КПРФ-дин Дагъустанда авай отделенидиз регьбервал гана. Госдумада IV созывдин депутат хьана. КПРФ-дин член. Мегьарамдхуьруьн райондин Агъа Ярагърин хуьряй я.
Рагьимов Тельман Музагьирович — Дербент шегьердин мэрдин меслятчи, карчи. “Единая Россия” партиядин член. Мегьарамдхуьруьн райондин Самур хуьряй я.
Ражабов Фирудин Жамирзеевич — виликдайни Дагъустан Республикадин Халкьдин Собранидин депутат тир. “Единая Россия” партиядин член. Докъузпара райондин Текийрин хуьряй я.
Хидиров Мурадхан Хидирович — виликдайни Дагъустан Республикадин Халкьдин Собранидин депутат тир. Ада гьакIни “Махачкъаладин гьуьлуьн алишверишдин порт” АО-диз регьбервал гузва. “Справедливая Россия” партиядин член. Мегьарамдхуьряй я.
Яралиев Имам Музамудинович — жемиятдинни сиясатдин машгьур деятель, карчи, меценат. 1995-2006-йисара — РД-дин прокурор, 2006-2010-йисара СтIал Сулейманан райондин кьил, 2010-2015-йисара Дербент шегьердин мэр, Дербент шегьердин Собранидин депутат. “Единая Россия” партиядин член. СтIал Сулейманан райондин Вини СтIалрин хуьряй я.
«Лезги газет»
