Чечен Республикадин кьил яз нубатдин сеферда Рамзан Къадиров хкя хъувунва. 5-октябрдиз Грозный шегьерда ам республикадин кьилин къуллугъдал тестикьаруниз талукьарнавай мярекат кьиле фена. “Лезги газетдиз” РД-дин Кьилин пресс-къуллугъди хабар гайивал, и мярекатда Дагъустандин Кьилин везифаяр вахтуналди тамамарзавай Сергей Меликовани иштиракна.
С.Меликова къейд авурвал, Дагъустандинни Чечнядин тарихар сад-садахъ галаз сих алакъада ава. “Чи гзаф кьадар адетри, къанунри диндин, медениятдин, руьгьдин ивиррин рекье халкьарин садвал къалурзава. Гьавиляй Дагъустан ва Чечня гьамиша санал ала: четин легьзейра сада-садаз куьмекзава, агалкьунар хьайила, санал шадвал пайзава. Гьамиша гьа икI жеда”, — лагьана Дагъустандин Кьили.
Мярекатдин сергьятра аваз С.Меликова Рамзан Къадироваз Дагъларин уьлкведин халкьдин тIварцIихъай нубатдин сеферда республикадин кьил яз хкя хъувун мубаракна, адахъ ва стха чечен халкьдихъ еке агалкьунар хьун алхишна.
«Лезги газет»
