Россиядин писателрин Союздин член, алкьвадарви муаллим, шаир, Алкьвадар Гьасан эфендидин музейдин директор ва адан ирсинин къайгъудар Гьуьсейн Гьуьсейнов гзафбуруз чида. Гьелбетда, сифте нубатда — муаллим яз. Эхиримжи йисара филологди вич инсанриз писатель хьизни малумарнава. Идан гьакъиндай адан къелемдикай хкатнавай са шумуд ктабди шагьидвалзава. Ингье цIи мад са ктаб майдандиз акъуднава. Урус чIалал — «Слова любви произнося стихами…».
Ктабдин кьетIенвал ам я хьи, са жилдиник кьве ктаб — «Слова любви произнося стихами…» ва «Любовь нас делает поэтами» акатнава. Эгер сад лагьайдак вичин лап хъсан шиирар, кьуд цIарар, рубаияр, урус чIалал таржума авунвай Алкьвадар Гьасан эфендидин эсерар, лезги хуьрерикай кьуд цIарар, лезги халкьдин муьгьуьббатдин манияр кутунватIа, кьвед лагьайда шаирдин кIанивилин гьиссерикай яхцIурни цIудав агакьна шиирар, кьуд ва кьве цIарар, рубаияр, «КIанивили чакай шаирар ийизва» поэма гьатнава.
Уьмуьр акунвай, гзаф кьваларай-хъутIалрай экъечIнавай касди кIанивиликай теснифнавай шиирар таъсирдайбур, жуван жегьил вахтар рикIел хкиз тазвайбур, кIанивилин гьиссдин къуват, мумкинвилер цIийи кьилелай ачухиз куьмек гузвайбур я. Шаирдихъ вичин кьетIен хатI ава. Уьмуьрдизни ам вичин вилерай килигзава. Гьавиляй эсерар кIелдайбурни ада яратмишнавай къаматриз, шикилриз Гьуьсейнован вилерай килигайтIа, шииррин гъавурда фад акьада.
Писателдиз чи алхиш сад я — цIийидан гуьгъуьна мадни ктабар хьурай!
Абад Азадов
