Дериндай фикир гайила, вичихъ неинки район, гьатта республика патални метлеб авай “Сардархуьр-ДаркIушар”  хъвадай ва дигидай ятарин еке линия тухунин кIвалахрив эгечIна гзаф йисар я.

И девирда республикадин кьил пуд сеферда дегиш хьана. Амма абурукай садани гележег патал еке метлеб ва игьтияж авай и имаратдин кIвалахар вилик тухвана куьтягьна, адакай менфят къачудай мумкинвал ганач.

Гьелбетда, са жерге кIвалахар ина авунва, амма кар алай месэ­ла­­яр­ лап яргъал вегьезва. ВацIай яд кIватI­дай гьамбархана, ам михьи­ хъийидай тадарак гьазур я. Ги­­­ла яд хуьрерив агакьардайвал туь­­­к­Iуьру­нин кIвалахар авуна кIан­зава.

РикIел лап хъсандиз алама, вилик-кьилик квайбуру хуьрерив яд гьеле 2014-йисуз агакьда лагьайди тир.

Гьайиф хьи, кIвалахдин еришар яваш я. Гагь акъвазда, гагь ахъайнавай пул амач лугьуда, гагьни, мад эгечIна, са вуч ятIани ийиз башламишда. Инсанрини и крариз фикир тагуз туш.

Ингье и йикъара кIвалахар мад гъиле хкьунва лагьай ван чкIана. И кардикай хабар хьайи зунни шад хьана, герек чкадихъ рекье гьатна. Ятар агакьардай виликан къаналдал атана. Инал гужлу тракторди ва  экскаваторди зарбачивилелди кIва­лах­завай. Са шумуд декьикьада абуру манийвалзавай гуьнедин са кьатI вахчуна, герек чкаяр дуьзарна­, гуьгъуьналлаз кIвалахиз къвезвайбуруз рехъ ачухна. И гужлу техника­дал гъавурдаваз, нетижалудаказ кIва­­лах­завай Идрисов Зейнудина ва Гьасанов Абумуслима ихтилат авурвал, инай дигидай цин чIутхварар, па­­та­вайни хъвадай цин турбаяр тухуда. 3500 метрдилай и кьве линия сад-садавай чара къаналрай фида, абурни эгъуьнна, фадлай гьазур я. Санлай гьисаба кьурла, дигидай цин линияр 7 кило­метрдиз чIугвада. Ам виликрай эгъуьн­навай, гзаф чкаяр дуь­­зар хъувунвай чкадай тухузва. Анай дигидай яд КIварчагъ дередив агакьда, усадьбаяр квачиз, жемятдин 2000 гектар чил целди таъмин же­­да. Исятда кIвалахрик юзун акатнавайди аквазва. “Тракторист Зейнудин Идрисова, экскаваторщик Абу­муслим Гьасанова, рабочияр Си­­ражудин Абдуллаева, Исрапил Алиомарова, Ислам Агъамирзоева ва масабуру гьакъисагъвилелди зегьмет чIугвазва, рабочий вахтуникай тамамвилелди менфят къачузва”, — ла­гьана чаз вичихъ галаз хьайи суьгьбетда устIар Гьажимирзоев Фа­зила. Йикъа 300 кубометрдин чкаяр накьв акъудиз, масанал тухуз дуь­­зарзава ва гегьеншарзава. Гуьнеяр падзавайбурун патавай чун винелди, Сардархуьруьхъди тракторри дуьзарнавай къаналдай фена. Инани рабочийри, техникади кIва­лахза­ва. Вуч кIвалах я ла­гьай­тIа, ар­мату­раярни лазим маса затIар ишлемишуналди, гужлу чIут­хвар туь­кIуьрза­­ва. Ам саки 7 километрдинди жеда ва куьтя­гьайла анай дигидай яд фи­да. Бетон­ Дербентдай ва Алкьвадрин заводрай гъизва. Гьелелиг 3 километрдин мензилдай чIут­хвар гьазур я ва агъа­дихъди и кIва­лах давамарзава. И кIва­лахар акурла ри­кIик са тIи­мил шадвал акатзава, кIва­лах чка­­дилай юзанвайдини ашкара я. Сагърай чеб, кIвалахар кьилиз акъуд­завайбур.

• Хъвадай цин месэла гьикI жезва? — хабар кьуна за устардивай.

— Линия “Хьарар” тIвар алай чкадал кьван санал гъида. Анлай хъвадай цин турбаяр эрчIи патаз, муькуь къаналдиз авудда ва анай кьилди тухуда, — лагьана ада.

• Ибур зурба кIвалахар я, абур ни кьиле тухузва?

— Эхь, еке месэлаяр я. КIвала­хар Махачкъаладин “Шер” компанияди гьиле кьунва. Адаз Сулейман-Стальский райондин СМУ-ди­ни екез куьмекзава. Адан начальник тежрибалу пешекар, инженер Гьажимирзоев Загьира кIвалах­рал гьамиша гуьзчивалзава, ам чкадал къвезва, лазим куьмекарни гузва.

• Хъвадай цин турбаяр мус кутада?

— Абурни фикирда ава. Пул ахъа­­­ю­нал вил ала. Ам агакьнамазди башламишдайвал я.

• ЧIутхвар мус куьтягьдайвал я?

— Аллагьди гайитIа, йисан эхирдалди куьтягьдайвал чалишмиш жеда.

Ажеб жедай гьакI дуьзмиш хьанайтIа. Яд гуьзлемишзавайбурун мурадни гьа ихьтинди я.

Райсудин Набиев