Малум тирвал, РД-дин Кьил Рамазан Абдулатипован тапшуругъдалди Дагъустандин вири районра чкадин самоуправленидин, къанун-къайда хуьдай органрин, диндин къуллугъчийрин ва общественный тешкилатрин векилар кваз терроризмдин идеологиядиз акси кlвалах тухун патал махсус дестеяр тешкилнава.
И йикъара Белижда Дербент районда кардик квай АТК-дин аппаратдин ва поселокдин рабочий дестейри Сириядиз фенвайбурун мукьвабурухъ галаз диндин экстремизмдиз ва терроризмдиз аксивал авунин месэладай гуьруьш тухвана.
Мярекатда поселокдин администрациядин кьил Рамиз Гьабибулаева, АТК-дин векилар тир рабочий дестедин руководитель Нежмутдин Алиева, кьилин пешекар Шагьбаз Гьажалиева, Россиядин МВД-дин Дербент районда авай отделдин участковый инспектор Бахтияр Агъаева, поселокдин Собранидин депутат Заур Велиханова ва масабуру иштиракна.
Гуьруьш ачухай Рамиз Гьабибулаева поселокдин рабочий дестеди Дербент райондин ОВД-дин работникрихъ галаз санал тухузвай кlвалахдикай гегьеншдиз лагьана. Адан гафарай малум хьайивал, Сириядиз фенвайбурун мукьва-кьилийрихъ галаз профилактикадин ва гъавурда твадай суьгьбетар тухванва, и кlвалах давамарзава.
Гуьруьшдилай гуьгъуьниз за мярекатдин иштиракчийривай районда и рекьяй тухузвай кlвалахдикай куьрелди лугьун тlалабна.
Нежмутдин Алиев: “Экстремизмни терроризм акьалтзавай несилдив гьич гатlумар тавунин мураддалди Дербент районда общественностдин, динэгьлийрин, къанун-къайда хуьдай органрин куьмекдалди зурба кlвалах кьиле тухузва. Амма, гьайиф хьи, чи са бязи жегьилар адетдинди тушир исламдин рекьиз физва. Экстремизм ва терроризм гегьенш хьун чи уьлкведин хатасузвилиз ва саламатвилиз кьецl гузвай себебрикай сад я. Райондин сергьятра яшамиш жезвай цlудралди инсанри алай вахтунда Сирияда бандитрин дестейра аваз дяведа иштиракзава. Идан себебни районда са кьадар диде-бубайри гъвечlи чlавалай чпин аялар азад вахтунда квел машгъул ятlа, гьадал гуьзчивал тухун тавун я. Россияда къадагъа авунвай ИГИЛ-дин таъсирдик акат тавун патал аялрихъ галаз тербиядин кlвалах тухун диде-бубайрин эвелимжи буржийрикай сад я. Заз лугьуз кlанзава хьи, чна къанунар кваз кьун, уьлкведин Конституциядин къайдайрал амал авун лазим я. Капl-тlеат ийиз садазни къадагъа авунвач. ЯтIани, чаз аквазвайвал, бязи жегьилар терроризмдинни экстремизмдин идеологиядиз мукьва жезва, адетдинди тушир исламдин рекьиз физва.
Чна, вирида сад хьана, экстремизм ва терроризм арадай акъудуниз талукьарна, образованидин идарайра, мискlинра, жегьилрин арада ва гьакl агьалийрихъ галаз суьгьбетар, элкъвей столар, собранияр тешкилна, акьалтзавай несил дуьз рекьел гъун ва дуьз рекье тун патал тухузвай кlвалахдин еришар йигинарун лазим я”.
Шагьбаз Гьажиалиева къейдна хьи, Дербент райондин сергьятра экстремизмдинни терроризмдин идеологиядин таъсирдик акатнавай ксарни ава. Радикальный исламдин рехъ кьунвай 400 кас администрациядин ва райондин полициядин отделдин учетдиз къачунва.
Райондин администрациядин терроризмдиз акси отделди хуьрерин агьалийрин арада еке кlвалах тухузва.
Къагьриман Ибрагьимов
