И йикъара Мегьарамдхуьруьн районда республикадин халкьдин яратмишунрин “Самурдин зул” фестиваль кьиле фена. Дагъустан Республикадин медениятдин министерстводи ва Мегьарамдхуьруьн райондин администрацияди тешкилзавай и мярекатдин макьсад Дагъларин уьлкведин халкьарин культурадин кьетIенвал хуьн ва вилик тухун я. Фестивалдин мярекатра Мегьарамдхуьруьн райондин кьил Фарид Агьмедова, райадминистрациядин жавабдар къуллугъчийри, райондин идарайрин ва тешкилатрин регьберри, хуьрерин кьиле авай ксари, районэгьлийри ва мугьманри иштиракна. 

Гзаф миллетрикай ибарат Дагъларин уьлкведин суварик Мегьарамдхуьруьн, Ахцегь, Агъул, Ру­тул­, Но­волак, Хив, Сулейман-Стальский, До­къузпара, Дербент, Къаякент, Тлярата районрай ва Къизилюрт, Дагъустандин Огни шегьер­рай тир милли манияр тамамардайбуру ва фольклордин коллективри иштиракна.

Фестивалдин иштиракчийрин ва тамашачийрин тIварарихъ тебрикдин келимаяр лугьунихъ галаз сад хьиз, Мегьарамдхуьруьн райондин кьил Фарид Агьмедова фестивалдин важиблувал къейдна, райондин культурадин хиле зегьмет чIугваз­вай са кьадар ксарив “Мегьарамдхуьруьн район” МР-дин гьуьрметдин грамотаяр, фестивалдин иштиракчийрив Мегьарамдхуьруьн райондин администрациядин патай пишкешар вахкана.

Концертдин гегьенш программади тамашачийрин гуьгьуьлар мадни ачухарна. Дагъустандин халкьа­рин милли пек-партал алай гадайрини рушари тамамарай гьар са нумра абуру гурлу капар ягъуналди кьабулна.

Фестивалдин сергьятра аваз хуьруьн майишатдин мекерани тешкилнавай. Анал райондин аграрийри гьасилзавай продукция эцигнавай, хуьрерин майданрал милли хуьрекар дадмишиз жезвай. “Къизилдин зул” выставка иллаки фикир желбдайди хьанвай. Ана Мегьа­рамдхуьруьн райондин искусствойрин школадин ва аялрин яратмишунрин центрадин векилри чпин кIвалахар ва проектар эцигнавай.

«Лезги газет»