29-сентябрдиз Дербент шегьердин “Нарын-къеле” стадиондал Дагъустандин чlехи мехъер кьиле фена: са юкъуз гьа са вахтунда 16 миллетдин векилрин гьар жуьре яшарин 24 жуьт эвленмиш хьана. И мехъерик 10 агъзурдалай виниз шегьерэгьлийри, къунши районрин агьалийри, гьакlни Россиядин маса шегьеррай атанвай мугьманри иштиракна.
Ана Дагъустан Республикадин Гьукуматдин Председателдин Сад лагьай заместитель Анатолий Къарибова, “Россиядин рекордрин Ктабдин” кьилин редактор Алексей Свистунова, РД-дин туризмдин ва халкьдин сеняткарвилин крарай министр Расул Ибрагьимова, Дербент шегьердин кьил Хизри Абакарова, Дербент ва Мегьарамдхуьруьн районрин кьилер Фуад Шихиева, Фарид Агьмедова ва масабуру иштиракна.
Мярекатдин кьилин иштиракчияр тамашачийри гурлу капар ягъуналди къаршиламишна.
Эвленмиш жезвай са жуьт квахьнавайдакай мехъерин тамада Карен Мкртчяна малумарна. Абурухъ мярекатдин иштиракчияр, тамашачияр гзаф къекъвена, амма абур санайни жагъанач. Ахпа абур садлагьана стадиондал цавай гьавадин чlехи шарда аваз эвичlна. И нумради халкьдин шадвал мадни артухарна. И арада мярекатдик жегьилрин мукьва-кьилиярни экечlна. Абуру милли перемар алаз мехъер кьиле тухунин адетар къалурна.
Ахпа гаф Хизри Абакароваз гана.
— Гьуьрметлу дустар! Квез виридаз чизва хьи, Дербент виридалайни къадим шегьер я. Чи шегьердин тарихдин имаратар вири дуьньядиз машгьур я ва абур ЮНЕСКО-дин ирсинин сиягьда тунва. Чи шегьер патал 2019-йис кьетlенди, ам виликди финин цlийи девир я. И кардин патахъай чна Дагъустандин Кьил В.Васильеваз ва РФ-дин Федеральный Собранидин Федерациядин Советдин член Сулейман Керимоваз сагърай лугьузва.
Гьуьрметлу чамар ва сусар! Куьн къе тарихдин зурба вакъиадин шагьидар я. За квез яргъи ва бахтлу уьмуьр, муьгьуьббат, сагъвал ва и дуьньядал алай кьван вири хъсанвилер хьун алхишзава!
Иштиракчийриз алхишрин хуш келимаяр А.Къарибовани лагьана. Ада жегьилриз ва мугьманриз и еке метлебдин вакъиа — чlехи мехъер мубаракна, ихьтин зурба мярекат Дербентдин тарихда амукьдайди къейдна. Дагъустандин Кьил В.Васильеван патайни кlватl хьанвайбуруз ада чlехи мехъерин сувар мубаракна.
Ана иштиракай машгьур манидарри, Дагъустандин кьуьлердай академический “Лезгинка” ва шегьердин “Гюнеш” ансамблри мярекат генани гурлу авуна.
Мехъерин нетижа кьун патал гаф Алексей Свистуноваз гана. Ада Дагъустандин Чlехи мехъери кьве рекорд эцигнавайди раижна: виридалайни гзаф миллетрин ва виридалайни гзаф мугьманри иштиракай мехъер. Ада и мярекат Гиннессан рекордрин Ктабда гьатнавайди малумарна. И кар тестикьарзавай сертификат ада Хизри Абакаровав вахкана.
Къагьриман Ибрагьимов
