Ислен юкъуз РД-дин гьукуматда кьиле фейи Оперштабдин заседанидал Сергей Меликован тапшуругъдалди, хатасузвилин къайдайрал амал тавуна, газ тухванвай кIвалер, майишатар винел акъудунин жигьетдай республикада кьиле тухузвай кIвалахдин сифтегьан нетижаяр кьуна.
Анал Дагъустандин премьер-министр Абдулмуслим Абдулмуслимова хабар гайивал, 23-26-январдиз 2398 абонент ахтармишунин кIвалахар кьиле тухвана. Нетижада къанун чIурнавай 692 дуьшуьш винел акъудна: 314 дуьшуьшда, хатасузвилин къайдайрал амал тавуна, кIвалериз газ тухванвай, 378 дуьшуьшда – сертифицировать (талукь идарайри ишлемишдай ихтиярар гун) тавунвай газдин алатрикай менфят къачузвай. Ихьтин дуьшуьшар виридалайни гзаф Махачкъала, Хасавюрт шегьерра ва Къумторкъала районда винел акъуднава.
РД-дин энергетикадин ва тарифрин министр Марат Шихалиева къейд авурвал, ахтармишунрин кIвалахра 47 бригадади иштиракна. И жигьетдай мярекатар тешкилунин кардал гьакIни газдин къуллугърин 145 пешекарни желбнавай.
А.Абдулмуслимова и барадай кIвалах давамарун тапшурмишна ва къанундихъ галаз кьан тийизвай гьар са дуьшуьшда герек тир серенжемар кьабулун буйругъна.
Агьмед Магьмудов
