13-ноябрдиз “Уйташ” аэропортуна тIебии тушир интеллектдай ва делилар вири патарихъай ахтармишунай (анализ) международный AI Journey конкурсда гъалиб хьайи Саид Азизов къаршиламишунин шад мярекат кьиле фена. Адаз агалкьун тебрикиз РД-дин образованидин ва илимдин министрдин везифаяр вахтуналди тамамарзавай Ягья Бучаев, Дагъустандин илимрин ГъвечIи академиядин директор Аймесей Дибирова, республикадин кIелзавай аялрин арадай бажарагълубур майдандиз акъудунин ва абуруз виликди фидай мумкинвилер гунин центрадин руководитель Аида Далгатова, чемпиондин багърияр ва дустар атанвай.
Къейд ийин, Саид Азизован ери-бине Ахцегь райондин КьакIарин хуьряй я.
Ягья Бучаева къейд авурвал, Дагъустандин жегьилри дуьньядин уьлчмейриз жаваб гузвай чпин мумкинвилер ва чирвилерин дережа къалуруни рикIик иллаки еке шадвал кутазва.
“Ихьтин аялрихъ галаз алакъалу я чи республикадин, уьлкведин гележег. Дагъустанда бажарагълу аялар гзаф ава. Чна лагьайтIа, абуруз чпин алакьунар, мумкинвилер мадни вини дережадиз акъуддай мумкинвал гун патал вири шартIар тешкилда.
Милли “Образование” проектдин сергьятра аваз 2022-йисуз Каспийскда “Кванториум” ачухун пландик ква. Идалайни гъейри, сентябрдиз регионда аялрин ва жегьилрин бажарагъ винел акъудунин, абуруз куьмек гунин ва виликди тухунин цIийи “Альтаир” центр (“Сириус” центрадин образованидин къайдадал бинеламиш яз) ачухдайвал я.
Дагъустандин Кьил Сергей Меликован тапшуругъдалди региондин образованидин “Альтаир” центрада 2022-йисуз 320 касдиз чкаяр жедай тарсар гудай корпус ва 240 касдиз чкаяр жедай общежитийрин кьве корпус эцигиз башламишда. Центр, “Образование” милли проектдин сергьятра аваз, чирвилер гун ва лабораторийда ахтармишунар тухун патал алай аямдин лазим тир виридалайни цIийи тадаракралди таъминарда ва уьлкведа виридалайни хъсанбурукай сад жеда”, — къейдна идарадин руководителди.
Центради суткада кьиляй-кьилиз кIвалахда. Чирвилер республикадин виридалайни хъсан муаллимри ва тренерри гуда, гьакIни иниз уьлкведин кар алай педагогриз эверда.
Саида кIватI хьанвайбуруз вич чимидаказ къаршиламишунай чухсагъул лагьана ва гележегда мадни вини дережадин акъажунриз ва муракаб, важиблу гъалибвилериз гьазур жедай фикирдал алайдакай хабар гана.
“Саидан гъалибвал — им вири республика, иллаки адан хизан патал хуш вакъиа я. Умуд кутазва, хтулди РФ-дин Президентдихъ галаз гуьруьшмиш хьайила малумарай теклифри ва цIийиз ачухзавай центрайри республикадин вири жегьилриз чпин мумкинвилер ахтармишиз ва Дагъустандиз мад ва мад сеферра гъалибвилер гъиз куьмекда”, — лагьана С.Азизован чIехи бубади.
РикIел хкин, Каспийскдин юкьван умуми образованидин 2-нумрадин мектебдин 11-классда кIелзавай Саид Азизовакай Сбербанк ПАО-ди ва ИИ Альянсди тешкилнавай тIебии тушир интеллектдай ва делилар вири патарихъай ахтармишунай международный AI Journey конкурсдин гъалибчи хьанва.
Лал ва биши ксар патал программадин демоверсия тир адан проект конкурсда иштиракзавай 2000 кIвалахдин арада виридалайни хъсанди яз хьана. Жегьил дагъустанвиди ва адан командади 1 миллион манатдин кьадарда авай приз къазанмишнава.
«Лезги газет»
