Алай йисан эвел кьилера Ахцегь райондин кьилин заместитель Вадим Агъасиев Хинерин хуьруьн юкьван мектебдиз мугьман хьанай. Чкадин муаллимрин коллективдихъ галаз кьиле фейи рахунрай мектебда авай мебель куьгьне хьанвайди, ина спортдин мярекатар, физкультурадин тарсар тухун патал герек къвезвай шейэр авачирди малум хьана.
И кардикай райондин кьил Осман Абдулкеримоваз хабар гана ва ада, энгел тавуна, Хинерин хуьруьн мектебдиз лазим шейэр агакьарун патал пулдин такьатар чара авун тапшурмишна. Нетижада райондин образованидин идарадив цIийи мебель ва спортдин тадаракар агакьарна. Идакай “Лезги газетдиз” муниципалитетдин администрациядин пресс-къуллугъди хабар гана.
Мектебдин гьакъиндай къайгъударвиляй муаллимрин тIалабун кьилиз акъудунай Хинерин хуьруьн мектебда кIвалахзавайбуру райондин кьилевайбуруз сагърай лугьузва.
«Лезги газет»
