Алатай ял ядай йикъара, 6 ва 7-февралдиз республикадин меркездин куьчеяр кIватI хьанвай зирзибилдикай михьи авун патал вири шегьердин субботник кьиле тухвана.
РикIел хкин, региондин оператор тир “Лидер” ООО вичин везифайривай къерех хьун себеб яз, 2021-йисан январдилай кьулухъ Махачкъала ва Каспийск шегьерра зирзибил вахчунин ва терг авунин месэла хциз акъвазнава. Гьелбетда, и шегьеррин бязи районра ва я куьчейра месэла хсуси къуватралди гьялиз алахъзава, агьалияр субботникриз экъечIзава. Идара ийизвай компанийри, месела, Каспийскдин чешнелу карханайрикай сад тир “Маяк” УК-ди, хсуси такьатралди ва шегьердин администрациядихъ галаз санал вичин къаюмвилик квай вири чкайра михьивал хуьз алахъзава, зирзибил вахчудай ва полигонрив агакьардай махсус техника желбзава, карханади ихьтин субботникар вахт-вахтунда кьиле тухун гьатта кIвалахдин пландик кутунва. Ихьтин чешнеяр Махачкъаладани ава. ЯтIани, миллиондав агакьна агьалияр яшамиш жезвай и шегьерра зирзибилдин месэла алай вахтунда виридалайни хцибурукай сад яз ама.
Гьаниз килигна, РД-дин Кьил Сергей Меликован тапшуругъдалди, Махачкъаладин администрацияди ва Дагъустандин экологиядин ва тIебиат хуьнин министерстводи республикадин меркез гегьенш майданра михьи авунин серенжем кьиле тухвана. И карда гьам инсанрин къуватдалди, гьам махсус техникадалди меркездиз куьмек республикадин са жерге муниципалитетрини гана, хабар гузва министерстводин информациядин къуллугъди. Кьилди къачуртIа, Махачкъаладин куьмекдиз Къарабудахкент, Къаякент, Хасавюрт, Унцукуль, Хунзах ва Дахадаев районрин агьалияр атана. Серенжемдиз гьакIни 500 машиндилай артух махсус техника желбнавай.
Гъиле гьатнавай мумкинвилер тамамдаказ ишлемишун патал Махачкъаладин мулкунал логистикадин 12 пункт тешкилна, анрал техника ва инсанар кIватIнавай. Инрал шегьердин къакъажунин участокар ва техника патал рекьер тайинарна.
Субботникда саки вири министерствойрин, идарайрин ва шегьердин маса тешкилатрин коллективри, бизнес-кIватIалрин векилри, спортсменри, волонтерри активнидаказ иштиракна. Абурун гьардан хиве кьилди-кьилди къачур куьчеяр тунвай. Экологиядин ва тIебиат хуьнин министерстводи разивилелди къейдзавайвал, республикадилай къерехда яшамиш жезвай дагъустанвиярни къерехда акъвазнач. Абуру лазим тир алатралди ва техникадалди таъминарунин кардик чпин пай кутуна.
Умуми къуватралди, зирзибил кIватIдай чанахар эцигнавай махсус, я тахьайтIа какатайвал арадал гъанвай 800-дав агакьна майданар михьна, анрай 15000 кубометр зирзибил къерехдиз акъудна. Шегьердин администрацияди хабар гузвайвал, Махачкъаладиз маса муниципалитетрай атанвай куьмекчияр чими хуьрекралди таъминарнавай.
Гегьенш майданда аваз Каспийскда кьиле тухвай эхиримжи субботникдизни вишералди агьалияр экъечIна. Шегьердин мэр Борис Гонцова къейд авурвал, зирзибил вахчудай техника — 29 махсус машин — эцигунардай компанийри: “Аркада-СТ”, “Прогресс”, “АбсолютСтрой”, “ГринГрупп” карханайри ихтиярда вугана.
Къейд ийин, къенин юкъуз вахтуналди, конкурсдин сергьятра аваз хкядалди Махачкъалада региондин оператордин везифаяр тамамардай кьве кархана тайинарнава. ИкI, “Центральная 1”, “Центральная 2”, “Северная 1” ва “Северная 2” мулкара михьивал таъминарунин гьакъиндай “Махачкала-1” МБУ-дихъ , “Кьибледин” ва “Дагъдин” мулкара — Дербент шегьердин “Горсервис” МБУ-дихъ галаз икьрарар кутIуннава.
Субботникар кьиле тухунин карда куьмек гайи вирибуруз шегьеррин кьилери, гьакIни амай вири агьалийри рикIин сидкьидай чухсагъул малумарзава.
Жасмина Саидова
