И мукьвара кьисметди зун Астрахань шегьердиз ЧУЗ КБ «РЖД — Медицина» махсус центрадиз акъудна. Ина зун чи ватанэгьли, бине Докъузпара райондин Миграгърин хуьряй тир илимрин доктор, профессор, машгьур хирург Элдар Абдурагьимович Кчибегова кьабулна. Гьам себеб яз, ана зи сагъламвилин гьал вири патарихъай ахтармишна, герек дарманар, сагъламвал мягькемардай асул рекьер теклифна.
Зи къайгъуда и больницадин терапиядин отделенидин (заведующий — Маргарита Петровна Иванова) саки вири персонал, духтуррилай гатIунна, медсестрайрал къведалди, вири сад хьиз, кIвачел хьана. Маргарита Петровнадиз за кьилди сагърай лугьузва!
Кьилинди ам я хьи, клиникада инсандин бедендин вири органар, паяр дериндай ахтармишдай алай аямдин лап цIийи ва муракаб техника, технологияр, тадаракар кардик ква. Гьахьтин вини дережадин пешекаррини кIвалахзава. Заз чир хьайивал, Элдар Абдурагьимовичалай гъейри, ана хейлин маса дагъустанви алимрини, духтуррини — халисан пешекарри зегьмет чIугвазва. Абуру агьалийрин патай гьуьрмет, авторитет къазанмишнава. Хейлинбурухъ гьуьрметдин чIехи тIварар ва государстводин маса шабагьар ава. Им дамахдай кар я. Абурухъ саки вирибурухъ галаз зун а йикъара танишни хьана. Абурун чирвилери, рафтарвилери, чпи чеб тухузвай тегьерди, студентрини алимри, духтуррини медсестрайри, куьмек кIанз атанвай начагъбуру, куьрелди, саки вирибуру чи ватанэгьлийрин ва санлай клиникадин кьиле авайбурун, пешекаррин гьакъиндай авур рахунар, чкадин газетрай, телевиденидин каналрай а йикъара (Россиядин АН-дин 300 йис къейдзавайла) акур материалри зун гьейранарна. Сагърай чеб вири!
Ина чи чIехи Ватандин гзаф халкьарин векилри, дуствилелди, гъил-гъиле кьуна, кIвалахзава. Чахъ, дугъриданни, чIехи илим ва гьахьтин медицинадин, хъсан пешекарарни, рикI михьи инсанарни гзаф ава!
И чар кхьиналди, заз неинки са Астраханда устадвилелди кIвалахзавай, гьакI чи Ватандин вири пипIера зегьмет чIугвазвай кьегьал рухвайризни рушариз сагърай лугьуз кIанзава.
«Лезги газет» кIелзавай дустаризни, эгер са гьихьтин ятIа начагъвилери, уьзуьрри квек къалабулух кутазватIа, халисан пешекаррин патав вахтунда фин меслят къалурзава. Чи газет виринра кIелзава, адаз гьуьрметзава!
Чими саламралди, Дербентда яшамиш жезвай миграгъви Изафер Мисенович Нурагьмедов.
