17-августдиз Кьурагь райондин администрацияда РД-дин здравоохраненидин министерстводин коллегиядин заседание кьиле фена. Идакай “Лезги газетдиз” муниципатилетдин администрациядин пресс-къуллугъди хабар гана.
Заседанидин кIвалах башламишдалди РД-дин здравоохраненидин министр Жамалудин Гьажиибрагьимов коллегиядин членрихъ галаз чIехи хуьрерин ФАП-риз, райондин ва участковый больницайриз тамашна, къатканвай азарлуйрихъ ва медперсоналдихъ галаз суьгьбетарна.
Коллегиядин заседанида иштиракайбурун арада, адан членрилай гъейри, Кьурагь райондин медицинадин идарайрин къуллугъчияр, гьакIни Кьиблепатан территориальный округдик акатзавай районрин центральный больницайрин кьилин духтурар, Дагъустандин здравоохраненидин къурулушдин подразделенийрин ва организацийрин кьилер авай. Коллегиядин заседанидин кIвалахда РД-дин здравоохраненидин министр Жамалудин Гьажиибрагьимова ва Курагь райондин кьил Замир Азизова иштиракна. Мярекат Жамалудин Гьажиибрагьимова кьиле тухвана.
“Районда эхиримжи пуд йисни ругуд вацран вахтунда здравоохраненидин ва санитарный гьаларин гьакъиндай” доклад Кьурагь райондин ЦРБ-дин кьилин духтур Азим Азимова авуна. Докладдай малум хьайивал, Кьурагь районда 14 759 кас яшамиш жезва. Гьахъ-гьисабдин вахтунда агьалийрин юкьван яшар 69 йисалай 69,7 йисалди артух хьанва. Аялар кьиникьин кьадар агъуз аватнава. Духтуррин юкьван мажибди вацра 47 агъзур манат тешкилзава. Районда 15 пешекарвиляй кадрияр бес жезвач. Азим Азимова райондин медицинадин идарайрин материально-технический базадин зайифвиликайни, пулдин такьатрихъ галаз алакъалу четинвилерикайни лагьана.
Гуьгъуьнлай ам райондин агьалийрин сагъламвал хъсанарун патал медицинадин идарайрин вилик акъвазнавай месэлайрал акъвазна. Докладдин вахтунда заседанидин членар экрандилай районда здравоохраненидин муниципалитетда яшайишдинни экономикадин гьалар къалурзавай слайдрихъ галаз таниш хьана.
“Духтурри ва медицинадин амай персоналди чпин тIем акакьзавай вири кIвалах кьилиз акъудзавач. ЦРБ-дин кьилин духтурар агьалийрин къуллугъда акъвазнавай кьилин тешкилатчиярни хьана кIанзава»,-къейдна вичин рахунра Жамалудин Алиевича. Ам РД-дин Кьиблепатан территориальный округдик акатзавай амай районрин ЦРБ-рин кIвалахда авай кимивилерални, гьакI электронный здравоохраненидал элячIунин месэлайрални акъвазна.
Коллегиядин заседанидал Роспотребнадзордин Дербент шегьердин территориальный отделенидин начальник Низами Адигуьзелов, Кьурагь райондин медицинадин идарайрин куратор Атай Мурзаев, РД-дин здравоохраненидин кьилин акушер-гинеколог Раисат Шагьсинова, кьилин терапевт Абдула Мегьамедов, кьилин кардиолог Мегьамед Идрисов, республикадин онкодиспансердин онколог Александр Терещенко, республикадин центральный инфекционный больницадин (ЦИБ) кьилин духтур Равзанат Мурзаева ва масабурни рахана.
Министрди ва коллегиядин членри гележегда райондин агьалийриз ийизвай медицинадин къуллугъар хъсанарунин месэлайриз талукь яз залда ацукьнавайбурулай атай гзаф суалриз жавабар гана.
Эхирдай Жамалудин Гьажиибрагьимова Кьурагь райондин кьил Замир Азизоваз куьмекдин гъил яргъи авунай ва райондин медицинадин идарайрин кIвалахдиз гьар йикъан фикир гунай сагърай лагьана.
Замир Азизова здравоохраненидин министрдин ва коллегиядин членрин тIварцIихъ чими келимаяр лагьана.
“Райондин кьилин везифаяр 8 йисан вахтунда тамамарзавай зун районэгьлийриз медицинадин рекьяй ийизвай къуллугъриз талукь месэлаяр галай-галайвал веревирд авунин шагьид сад лагьай сеферда хьана. Райондин вири агьалийрини, руководстводини квез и кардай сагърай лугьузва”, — алава хъувуна Замир Азизова.
«Лезги газет»
