—            Жалгъаяр тIазвайла, 4-5 лимон чкалар аламаз куьлуь авуна, 0,5 л эрекь илична, мичIи чкада са гьафтеда тада. Гьар юкъуз­ ксудалди вилик ам тIазвай жалгъайривай гуьцIна, чими шарфуналди кIевирна, пакамдалди тада.

—            Иммунитет хкажун патал кьурурнавай машмашдин патар, куьлуь авунвай алоэдин ва лимондин пешер (гьар сад са стаканда авайди), са стакандавай вирт, 5 цикIи кака, 0,5 л коньяк, 300 г дуьдгъвер вири сад-садак какадарна, ксудалди вилик чайдин са тIуруна авайди ишлемишда. Къаришма холодильникда  хуьда.

—            Хуквада хер авайла, 0,5 л нек ругуна, са тIимил рекъидалди тада. Зур литрдин банкадиз хана цикIи 2 кака хуьрекдин 2 тIу­руна авай кьери вирт, хъуьтуьл хьанвай гьакьван дуьдгъверни алава хъувуна, хъсандиз хуькуьрда. Ахпа а къаришмадиз, хуькуьриз-хуькуьриз, кузвай нек цада. Экуьнахъ ичIи ри­кIелай, куьлуь-куьлуь хупIар ийиз, ам хъва­да. Сагъарунин вахт са варз я.

—            Беденда дакIун (опухоль) авайла, келемдин дувулдикай менфят къачуда. Хуь­рекдин са тIуруна авай (таза ва я кьурай) келемдин дувулдал 0,5 л ргазвай яд илична, 8-10 сятда кIевирна тада. Ахпа ам куьзна, йикъа пуд-кьуд сеферда фу недалди вилик 1/4 стаканда авайди ишлемишда. Азардин вилик пад кьун патал келемдин ду­вулрин настойка цIуд юкъуз ишлемишун бес жеда.

—            Зулуз ва хъуьтIуьз бязи инсанрик мекьивилелай яргъал чIугур уьгьуьяр акат­да. Абур хкатун патал ксудалди вилик, са стакан­ чими некIедиз вад стIал ски­пидар яна, хъвада. Экуьнахъ уьгьуьдин  гелни амукьдач.

—            Хуьрек тIуьрдалай гуьгъуьниз ­хуквада са гьихьтин ятIани къулайсузвал гьисс ийидайла, йикъа пуд сеферда 1/4 чай­дин тIу­ру­на авай регъвенвай дарчинар (корица) чи­ми цихъ галаз ишлемишун меслят къалурзава.

—            Дамарра ивидин гьерекат гагь виниз, гагь агъуз жедайла, 40 твар михекрал 4 стаканда авай яд илична, зайиф цIал эцигна, яд кьве сеферда тIимил жедалди ргада­. Ам къайила, шуьшедин бутылкадиз­ цана, холодильникда хуьда. Йикъа пуд се­ферда хуьрекдин са тIуруна авайди иш­лемишда.

—            Пуд гьафтедин вахтунда гьар юкъуз хуьрекдин са тIуруна авай балугъдин чIем  ишлемишайтIа, жалгъайра авай кпулар гьамишалугъ квахьда.

—            Верчериз гузвай тварцик балугъдин са тIимил  чIем кутуртIа, абуру хазвай какайрихъ дава — дармандин эсер жеда. Ихьтин ка­­кайри дамарра ивидин гьерекат агъузарда, мекьивилелай арадал къвезвай азаррикай хуьда, гьакIни рак ва инфаркт азаррин вилик пад кьада.

—            Юкьва, далуда, юрфара тIал авайла, анрал верхи тарцин (береза) пешер эцигна, кутIунайтIа, тIал фад секин жеда.

—            Эгер яргъалди яшамиш жез кIанза­ва­тIа, тIимил тIуьн лазим я. Алимри субут­завайвал, незвай шейэрин калорияр 30-40% тIимил хьайитIа, ратари хъсандиз кIва­­лахда, уьмуьрни яргъи жеда.

—            Атеросклероздик азарлу хьанвай яш­лу инсанриз серкин къаришма хийирлу я. Михьи авунвай са кьил серг ва са лимон ра­кьай яна, кIвалин гьава­дин са литр яд илична, 2 суткада агал­навай­ къапуна тада. Йикъа 3 се­ферда фу не­далди вилик хуьрекдин са тIу­­руна авайди ишлемишда. Са вацралай куьне регьят хьанвайди гьиссда.

«Айболит» газетдай. Гьазурайди — Надият Велиева.