4-ноябрдиз Дербент райондин Падар хуьре Халкьарин садвилин югъ къейдна. Сувар Россиядин халкьарин адетдин культурадин центрдал кьиле тухвана.
Суварик РФ-дин Государстводин Думадин депутат Абдул Эмиргьамзаева, Кьиблепатан территориальный округда РД-дин Кьилин патай тамам ихтиярар ганвай векил Энрик Муслимова, “Дербент район” МО-дин кьил Мегьамед Желилова, РД-дин Халкьдин Собранидин депутатар Ягья Гьажиева ва Лейла Керимовади, райондин администрациядин работникри, общественный тешкилатрин векилри иштиракна.
Суварин концертдин программа Россиядин Федерациядин ва Дагъустан Республикадин гимнияр тамамаруналди башламишна. Кlватl хьанвайбуруз Россиядин халкьарин садвилин йикъан сувар М.Желилова, А.Эмиргьамзаева, Э.Муслимова, Я.Гьажиева, Л.Керимовади ва масабуру тебрикна.
Райондин культурадин управлениди гьазурнавай концертдин программадилай вири рази яз амукьна. Ахпа культурадин, милли политикадин ва динрин отделдин начальник Секина Саидовади мугьманриз Россиядин халкьарин адетдин культурадин центрада гьазурнавай выставкадин павильонар къалурна, ана авай дегь девиррин затlарикай суьгьбет авуна.
Къагьриман Ибрагьимов
