15-январдиз Дербент райондин администрацияда “Садвиле чи къуват ава” лишандик кваз Дагъустандин Автономиядин Советрин Социализмдин Республикадин 100 йис тамам хьуниз талукьарнавай мярекат кьиле фена.
Ана Дербент райондин кьил Мавсум Рагьимова, Дагъустан Республикадин Халкьдин Собранидин депутатар тир Яхья Гьажиева, Эрик Ибрагьимова, РФ-дин лайихлу военный летчик, генерал-майор Тагьир Гьажиева, райондин кьилин заместителри, къанун-къайда хуьдай органрин ва жемиятдин тешкилатрин векилри иштиракна.
Мавсум Рагьимова къейд авурвал, и йикъара чи республикада Дагъустандин Автономиядин 100 йис тамам хьунин сувар шад гьалара киле тухузва.
— Малум тирвал, 1921- йисан январдиз Вирироссиядин Центральный Исполнительный Комитетди махсус Декретдин бинедаллаз Дагъустандин Автономиядин Советрин Социализмдин Республика тешкилна, — лагьана ада. — Им Дербент районни арадал атай йис я. Къе чи район Дагъустан Республикадин мулкара важиблу стратегиядин роль къугъвазвай муниципалитет я. Чи райондин векилри намуслу зегьметдалди чпин тlвар хкажна, чи гъвечlи ватан уьлкведиз машгьурна. Дагъустанвийрин сейли ксарин жергеда Дербент райондин алимрин, культурадинни искусстводин деятелрин, генералрин тlварар ава… За квез мад сеферда чи республикадин чlехи сувар -100 йисан юбилей — рикlин сидкьидай мубаракзава. Заз чи республикадихъ ва райондин агьалийрихъ абадвал, ислягьвал, сагъвал, шадвал ва дуланажагъда хъсанвал хьана кlанзава, — алава хъувуна М.Рагьимова.
Тагьир Гьажиева ва Яхья Гьажиева райондин ва республикадин вири агьалийриз Дагъустандин 100 йисан юбилей рикlин сидкьидай мубаракна.
Гуьгъуьнлай шад гьалара гьакъисагъ зегьметдай, вини дережадин пешекарвиляй са жерге къуллугъчийрив грамотаяр, разивилин чарар ва маса шабагьар вахкана.
Гьихьтин сувар мани, кьуьл галачиз жеда! Лезги, табасаран, азербайжан театррин артистри, райондин халкьдин алатрин, кьуьлердай “Каспий”, урусрин манийрин “Огонек” ансамблри, аялрин яратмишунрин кlвалин жаван артистри рикlел аламукьдай хъсан концертдин программани къалурна.
Къагьриман Ибрагьимов
