2018-йисан 29-мартдиз чи халкьдин «ЛЕКИ» фондуни нубатдин мергьяматлувилин серенжем кьиле тухвана.
Жемятдин крарик къуьн кутазвай Зейнедин Абиловахъ галаз санал фондуни Ахцегьрин хуьре «Акъваз гишинвал» лишандик кваз серенжем тешкилна. Сувабдин и кIвалахдин сергьятра аваз, акьалтIай игьтияж авай 20 хизандиз недай суьрсет гуналди, куьмекдин гъил яргъи авуна. Хизанрив са шешелда авай гъуьр, гречка ва шекер агакьарна.
Жемятди «ЛЕКИ» фондунин активистриз ва и къени кардик пай кутур гьар сад сагърай лугьузва.
Къейд ийин хьи, садакьаяр гуникай, дарда авайбуруз куьмекдин гъил яргъи авуникай пак Кьуръанда еке метлеб авай келимаяр ава. Ша чна, играми стхаяр, ихьтин келимайрал амал ийин ва мергьяматлу кIвалахрик алакьдайвал пай кутан!
«Лезги газет»
