27-мартдиз Докъузпара райондин Кьил Абдурагьим Алискерова Ахцегьрин УОС-дин начальник Мажидин Мамедбеговахъ, Ахцегьрин УОС-дин филиалдин директор Алимегьамед Парванаевахъ ва чкадин СМИ-дин векилрихъ галаз «Къалажух – Каракуьре» чилериз яд гудай къаналдал кьил чIугуна.

КIвалах кьиле физвай чкадал Цийи-Каракуьредин администрациядин кьил Гуьлмегьамед Парванаева, инженер Селим Абдулселимова, куьмекчи жегьилрин дестеди ва экскаватордин водителди зегьмет чIугвазвай.

Малум хьайивал, и къанал тамамдаказ михьи тавуна пуд йис я. Къаналдин яргъивилел 16 км ала ва ада 4 хуьр дигидай целди таъминарзава: Каракуьре, ЦIийи-Каракуьре, Миграгъ-Къазмаяр ва са кьадар Усугъчай.

Ахтармишунар тухвайдалай кьулухъ, къанал михьи авунин кардал А. Алискеров рази яз амукьна. Жавабдар къуллугъчийриз ада вичин патай тапшуругъар ва меслятар гана.

Ихьтин еришда аваз кIвалах кьиле физ хьайитIа, къанал апрель вацран юкьваралди михьна акьалтIарда.

Дигидай цин къаналри райондин агьалийрин уьмуьрда кьетIен роль къугъвазва. Гатфарин сифте бере алукьайла, инсанри хуьруьн майишатдин кIвалахар башламишзава. Бахчайрин ва бустанрин куьмекдалди райондин чIехи пай агьалийри чпин кьил хуьзва. Гьелбетда, мублагь бегьер хьун патал дигидай целди таъминарун чарасуз я.

А. ЭМИРСУЛТАНОВ