И йикъара Кьурагь районда гьар йисуз кьиле тухун хъсан адетдиз элкъвенвай мад са серенжем акьалтIна. ИкI, 11-сентябрдиз Кьурагьрин 2-нумрадин юкьван школада кIелзавай аялри-волонтёрри «Сада сад хуьх!» лишандик кваз рекьерин гьерекатдин къайдаяр (правила) алай чарар, календарар ва светоотражателар паюниз талукьарнавай серенжем кьиле тухвана.
Райондин администрациядин физический культурадин, спортдин ва жегьилрин крарин рекьяй отделди тешкилнавай и серенжемдин кьилин макьсад — рекьерин гьерекатдин иштиракчияр чIуру дуьшуьшрикай – аварийрикай – хуьн тир. Гьаниз килигна волонтёрри улакьар гьалзавайбурухъ, рекьелай элячIзавайбурухъ велосипедрал алайбурухъ галаз рекьерин гьерекатдин къайдайрал амал авуниз талукьарна суьгьбетар кьиле тухвана.
Къейд авун лазим я хьи, 2023-йисуз рекьера хатасузвал таъминарун артухаруниз талукьарна муниципалитетди кьилиз акъудзавай программадин бинедаллаз алай йисуз волонтёрри-школьникри ихьтин серенжемар 6 сеферда тешкилнава. ДТП-рин вилик пад кьуниз талукьарнавай серенжемар машинар ва инсанар гзаф авай чкайра, гьакIни спортдин чIехи акъажунар кьиле тухузвайла тешкилнавай. Райадминистрациядин физический культурадин, спортдин ва жегьилрин рекьяй отделдин начальник Рамиз Рамазанова серенжем тешкилунай волонтёрриз сагърай лагьана. Ихьтин серенжемар къведай йисузни кьиле тухун пландик кутунва.
Рагнеда Рамалданова
