Государстводин патай куьмек ишлемишай гъвечIи ва юкьван карчивилин карханайрикай ва чпи-чеб кIвалахдалди таъминарзавайбурукай сифте делилар Федеральный налогрин къуллугъдин сайтда ачухнавай сад тир цIийи реестрдик кутунва. Идакай РД-дин экономикадин ва мулкар виликди тухунин министерстводи хабар гузва.
Реестр rmsp-pp.nalog.ru сайтда ава. Гьахъ-гьисаб ийизвай вацран делилар реестрдик кутун патал адан гуьгъуьналлай вацран 5-йикъалди агакьарун лазим я. ЦIийи реестрда гъвечIи ва юкьван карчивилиз (МСП) куьмек гуниз талукь къурулушдик акатзавай тешкилатри и ва я маса программадин сергьятра аваз государстводин патай куьмек агакьарнавай карханайрин гьакъиндай делилар ава.
Реестрдик государстводи ганвай куьмекдин гьакъиндай делилар кутунин ва я ихьтин делилар анай акъудунин кIвалах федеральный ва субъектрин властдин, чкадин самоуправленидин органри, гъвечIи ва юкьван карчивал виликди тухунин корпорацияди, адан къурулушдик акатзавай тешкилатди агакьарнавай делилрин бинедаллаз тамамарзава.
Алай вахтунда реестрда Дагъустан Республикадай тир ва государстводин патай куьмек ишлемишай карханайрин сиягь ава — КХ “ДАГЪУСТАН”, ООО “ДАГЪУСТАН ШУЬШЕДИН КЪАПАР», ООО “МАКСИМУМ ГРУПП ДАГЪУСТАН”, ООО “АЛИШВЕРИшдин КIвал “Дагъустан” ва мсб.
«Лезги газет»
