Чна виликамаз хабар гайивал, алай йисан 3 ва 4-октябрдиз Каспийскда, “Энергия” тIвар алай ДЮСШ-да, набут ва сергьятламиш хьанвай мумкинвилер авай инсанар патал тешкилнавай пешекарвилин бажарагъ къалурунин “Абилимпикс” сад лагьай фестиваль кьиле фена. Иштиракчийрин кьадар 50-дав агакьнавай. Абур иниз Махачкъала, Каспийск, Буйнакск (са руш — Москвадай) шегьеррай, Хив, Табасаран, Чарода ва маса районрай атанвай. Чемпионатдин программадик 6 жуьре хилерай-психологиядай, программированидай, массаж авунай, таржумачивиляй, баскетбол къугъунай ва школада кIелзавай аялар патални куьлуь хтарикай шикилар гьазурунай — акъажунар квай. Гамар ва халичаяр хурунай и чемпионатдин сергьятра аваз презентация кьиле тухвана. Иштиракчийрин кIвалахриз 50 касдикай (юкьван образованидин идарайрин муаллимар ва карханайрин векилар) ибарат тир жюриди къимет гана. Чемпионатдин тешкилатчи РД-дин зегьметдин ва яшайишдин жигьетдай вилик финин министерстводин жегьилар кIвалахдалди таъминарунин рекьяй “Успех” центр тир. И жуьредин фестиваль Кеферпатан Кавказда сад лагьай сеферда кьиле тухвана.
РикIел хкин: алай йисан августдиз РД-дин Гьукуматдин Председатель А.Гьамидова Дагъустанда сергьятламиш хьанвай мумкинвилер авай инсанар патал пешекарвилин бажарагъ къалурдай конкурсрин сад лагьай фестиваль тешкилунин ва кьиле тухунин месэлайрал машгъул жедай 16 касдикай ибарат тир десте тестикьарнай.
Алатай асирдин 70-йисара Японияда арадал атай “Абилимпикс” гьерекат яргъал вахтунда анжах са и уьлкведа кардик квай. И гьерекатдин международный конкурс сифте сефер яз 1981-йисуз Токиода кьиле тухванай. Гила чемпионатар, Олимпиададин къугъунар хьиз, 4 йисалай са сеферда тешкилзава. “Абилимпикс” гьерекатдал дуьньядин 40-далай виниз уьлквейри фикир желбнава. Россия и международный гьерекатдик 2014-йисуз экъечIна. 2015-йисуз сад лагьай милли чемпионат кьиле тухванай, ана уьлкведин 29 региондай тир 250-далай виниз инсанри 29 пешедай чпин устадвал къалурна.
Къейд авун лазим я хьи, чи республикада тешкилай сад лагьай фестиваль хъсан гьазурлухвал, тешкиллувал аваз кьиле фена. Чемпионатдин иштиракчийриз вири къулайвилер тешкилнавай. Абуру иштиракзавай хилез килигна, садбурув алатар авай ящикар вугана, муькуьбуру компьютеррихъ ва станокрихъ чка кьуна… Кьве юкъуз давам хьайи акъажунрин нетижада экспертриз бажарагълубур хкядай мумкинвал хьана. Милли чемпионатда гъалибвал къазанмишай жегьил гадайри ва рушари гила Россиядин хкянавай командадик кваз чпин устадвал дуьньядин чемпионатда къалурда. Идалайни гъейри, (и чемпионатдин кьилин макьсадрикай садни и кар тир) набут ва сагъламвал сергьятламишнавай хейлин ксариз кIвалахдай чкаяр жагъурдай мумкинвални хьана.
Чемпионатдиз тамашиз школайра кIелзавай гзаф аялар, республикадин машгьур спортсменарни атанвай. Абур ва чемпионатдин иштиракчияр патал Дагъустандин эстрададин гъетерин культурадин программани къалурна.
Рагнеда Рамалданова
