Ислягь жезва

Алай йисан 7-январдиз Россиядин Президент В.Путин Сириядиз фена ва уьлкведин регьбер Б.Асадахъ галаз гуьруьш кьиле тухвана. Идакай “Новости” РИА-ди хабар гузва.

Асадахъ галаз суьгьбет кьиле тухвай вахтунда В.Путина Сирия гуьнгуьна хтунин, уьлкведин мулкарин битаввал арадал хкунин жи­гьетдай гзаф кIвалахар тамамарнавайдакай лагьана. Гуьруьш кьиле фидалди вилик В.Путин Дамаск шегьердин куьчейра къекъвена ва адаз ислягь уьмуьрдал хтанвай лишанар акуна.

Б.Асада Россиядин регьбердиз уьлкведиз атунай ва терроризмдихъ галаз женг чIугунин карда куьмек гунай чухсагъул малумарна.

Къейд ийин, Сирияда граждан дяве 2011-йисан гатфариз  га­тIун­най. Женгерин асул иштиракчияр гьукуматдин яракьлу кьушунар ва террористрин кIеретIар я. Россияди Асадан тереф хуьзва.

Гзаф аялар авай хизанриз

И мукьвара Федерациядин Советдин Председатель В. Матвиенкоди малумарайвал, гьукуматди гзаф аялар авай хизанриз пулсуздаказ ва я тахьайтIа лап кьезил жуьредин ипотекадин шартIу­налди кIвалер гун герек я. Идакай “Интерфакс” чешмеди хабар гузва­.

“Яшамиш жедай кIвалерин жигьетдай гьукуматдин патай куьмек­ агакьдайдакай гзаф аялар авай гьар са хизанди аннамишдайвал авун герек я. КIвалер эцигунин кIвалахар гегьеншарун ва гзаф аялар авай хизанар пулсуздаказ кIвалералди таъминарун лазим я”, — лагьана В.Матвиенкоди пресс-конференциядал.

Ада хизанра гзаф аялар хьунин важиблувал къейдна. “Чаз ватанда­шар бес жезвач. Мумкинвилер авай, экономикадин рекьяй еримлу жезвай ихьтин чIехи уьлкведихъ къенин юкъуз бес кьадар агьали­яр­ авач. Уьлкведин махлукьат тIимил хьунин тIебии себебарни ава. Хизан­­ра пуд ва адалайни гзаф аялар хьун герек я”, — алава хъувуна Матвиенкоди­.

Ада рикIел хкайвал, ихтилат физвай месэладиз талукь сифте камарни къачунва. Пуд лагьай (ва адалай гзаф) аял хьайила, гьукуматди, ипотекадин пай яз, хизанди 450 агъзур манатдин эвездин пул къачунин къарар кьабулнава.

Ягъунар кьуна

Сифтедай Иракдин рагъакIидай пата Америкадин кьушунар авай Эйн-аль-Асад авиабазадал гьужумуникай малумарнавай. Гуьгъуьн­лай Пентагонди хабар гайивал, гьужумдик америкавийри ишлемишзавай уьлкведин кеферпатан Эрбилдин аэродромни акатна. Идакай “CNN” чешмеди хабар гана.

США-дин оборонадин министерстводи къейднавайвал, Ирандин мулкарай 12-далайни гзаф ракетаяр ахъайна. Гьужумдиз жаваб гун патал Пентагондиз мумкин тир вири серенжемар кьабулиз кIанзава. Алай вахтунда ведомстводи хьайи зарар ва барбатIвилер ахтармишзава. Бязи чешмейри къейдзавайвал, гьужумрикди Иракдин са шумуд агьалидиз, гьакI Америкадин самолетризни зарар хьана. Сад лагьай гьужумдилай кьулухъ Ирандин къуватри Америкадин объектриз кьвед лагьай сефердани ягъунар кьуна.

Ирандин терефди Америкадин объектриз кьур ягъунар генерал Сулеймани телеф авунай кьисас вахчунихъ галаз алакъалу авунва. Гьавиляй женгинин гьерекатдизни “Азабдик акатай Сулеймани” тIвар гана. Гьужумдай жавабдарвал Ирандин армиядин КСИР (Корпус стражей исламской революции)  подразделениди вичин хивез къачуна. КСИР-ди малумарайвал, викIегь аскерри военный Эйн-аль-Асад базадал ракетайрин куьмекдалди агалкьунралди гьужум кьиле тухвана­.

Мадни башкъа, ягъунрикайни хасаратвилерикай къерех хьун патал КСИР-ди США-диз Иракдай кьушунар ахкъудуниз эвер гана. Идалайни гъейри, иранвийрин кьушунри США-дин терефдарризни, эгер абуру чпин базайрилай Ирандин яракьлу къуватрал гьужум авуртIа, талукь тирвал жаза гун хиве кьуна.

Аккумуляторар гьикI хуьда?

Аккумуляторрин технологиядин пешекарди, смартфонар электричестводик кутадайла, инсанри рехъ гузвай гъалатIар раижна. Адан фикирдалди, батареяди яргъалди къуллугъ авун патал ам токдикай вахтунда хкуд хъувун чарасуз я. Электричестводик кутунвай телефондин аккумулятордин индикаторди 100 процент къалурзаватIа, яни тамамвилелди зарядка агакьнаватIа, ам вахтунда токдикай хкуд хъувун герек я. “BatterieIngenieure” тешкилатдин директор Д.Шультедин фикирар “Lenta.ru” чешмеди раижнава.

Пешекарди гаджетар йифен вахтунда электричестводик кутун тавун теклифнава, вучиз лагьайтIа гзафни-гзаф телефонрин сагьиб­ривай йифен береда зарядкадин гьал гуьзчивилик кутаз жезвач.

В.Путин — Туьркияда 

7-январдиз Россиядин Президент В.Путин Туьркиядиз фена. Стам­бул шегьерда кьве президентдин арада кьиле фейи гуьруьшдикай “Коммерсантъ” чешмеди хабар гузва.

Россиядин регьберди “Туьркиядин сел” тIвар алай газопровод ишлемишиз вахкуниз талукь мярекатдани иштиракна.

В.Путинак ва Р.Эрдоганак США-динни Ирандин араяр къизгъин хьуни къалабулух кутунва. Абурун фикирдалди, США-ди Ирандин генерал К.Сулеймани тергунин къарар кьабулуни а регионда хатасузвални пайгарвал чIурунал гъана. Гьа са вахтунда Иранди, жаваб яз, Америкадин авиабазадал авур гьужумдини четин месэлаяр гьялуниз куьмекдач, акси яз, а гьерекатри цIийи алаш-булашвилер арадал гъида. Президентри терефриз сабур хуьниз, акьуллу фикирдал атуниз, дипломатвилин къайдаяр ишлемишуниз эвер гана.

Къейд ийин, СМИ-рин векилрин иштираквал авачиз кьиле фейи гуьруьшдал президентар мадни хейлин месэлайрикай рахана.

Гьазурайди — К.Къалажухви