Россиядин мектебра тарихдин тарсар 1-классдилай башламишна гуда. Идакай Вирироссиядин мектебра кIелзавай аялрин тарихдин сад лагьай “Къуват — керчеквиле!” форумдин сергьятра аваз “Адетдин миллетчивал” выставка ачухзавай мярекатдал Россиядин просвещенидин министр Сергей Кравцова малумарна.
“Чна тарих рикIел хуьн, чир хьун патал вири жуьредин серенжемар кьабулда. За кьабулнавай къарардин бинедаллаз, тарихдиз талукь тарсар мектебра сад лагьай классдилай башламишна гуда”, — лагьана министрди.
Гуьгъуьнлай Минпросвещенидин кьили гъавурда турвал, ихтилат физвайди тарихдин просвещенидин тарсарикай я. Адан гафаралди, гьеле сифтегьан мектебдилай башламишна “Элкъуьрна кьунвай дуьнья” тарсунин сергьятра аваз жуван крайдин, гъвечIи ватандин тарих веревирд ийиз, музейриз ва выставкайриз физ жеда.
Кравцован теклифдиз баянар гудайла Президентдин пресс-секретарь Дмитрий Пескова малумарайвал, Минпросвещенидихъ ихьтин цIийивал кардик кутадай вири ихтиярар ава. “Ирид йисан яшда авай аялри, чIехи инсанри хьиз, вири крариз итиж ийизва”, — къейдна Д.Пескова. Адан гафаралди, месэладиз талукь яз эхиримжи къарар и рекьяй пешекарри кьабулун лазим я.
Алай вахтунда уьлкведин мектебра аялри и тарс 5-классдилай чириз башламишзава. Россиядин властри къецепатан бязи уьлквейра тарих цIийи кьилелай кхьидай чалишмишвилер ийизвайдакай са шумудра лагьанай. Президент В.Путина къейд авурвал, Москва Ватандин ЧIехи дяведикай гьахълу, керчек делилар хуьниз ва абур къалп “гьакъикъатдалди” эвезунин вилик пад кьуниз мажбур я.
«Лезги газет»
