18-апрелдиз Дагъустандин Кьил Сергей Меликован регьбервилик кваз регионда туризм вилик тухуниз талукь месэлаяр веревирдна. Совещанидин иштиракчийри туриствилин сезондиз гьазур жезвай гьалдикай, республикадихъ авай мумкинвилерикай, гьакIни и карда муниципалитетрин везифайрикай лагьана.
Шазан нетижайралди, республикадиз са миллиондилай гзаф туристар атана. Им, алатай йисарив гекъигайла, хейлин гзаф я.
“Туриствилин хел региондин экономикадин кар алайдаз элкъвезва лугьуз жеда. Алай йисуз Дагъустандиз мадни гзаф туристар атун гуьзлемишзава. Чи республикада туризм икI йигиндиз вилик фин чахъ авай мумкинвилери арадал гъана”, — къейдна региондин Кьили.
Ада туристар акъваздай ва абуру тIуьн недай чкаяр, килигуниз лайих авай чкайрал фидай рекьер хъсан гьалда авачирдакай, килигдай майданар талукь тадаракралди таъмин туширдакай, санитариядин ва хатасузвилин гьалар пайгардик квачирдакай информациядин такьатра кхьейди юлдашрин рикIел хкана.
Идахъ галаз алакъалу яз Дагъустандин Кьили къейдна хьи, туриствилин сезон башламишдалди амайди вири кьве гьафте я, амма муниципалитетри и кардиз бегьем гьазурвал акунвач.
“Кьилиз акъудун лазим тир хейлин итижлу проектар ава ва и карда муниципальный тешкилатри и кардик кьил кутунвайбуруз куьмек гун лазим я. Гафарилай крарал элячIдай вахт я. Сифтени-сифте тIуьн недай алай аямдин къулай объектар, санитариядин зонаяр, машинар акъвазардай чкаяр туькIуьрна, анра туристар желбун патал килигуниз лайихлу чкайрикай малуматар хьана кIанда”, — къейдна Сергей Меликова.
Вичин нубатдай, РД-дин туризмдин ва халкьдин сеняткарвилерин рекьяй министр Эмин Мерданова къейдна хьи, туристрин арада виридалайни машгьур чкаяр — Дербент, Сулакдин дагьар, Гуниб, Хунзах ва Шамил районар я.
Республикадин мугьманри гьам промышленностдин ва хуьруьн майишатдин, гьамни яхдиз къекъведай ва спортдин туризмдиз, экотуризмдиз еке итиж ийизва. Экотуризмдин виридалайни машгьур чкаяр къумадин тепе Сарыкъум, милли заповедник “Самурский” я. ГьакIни алай йисуз гьуьлуьн къерехда тIебиатдин “Папас” тIвар алай комплекс арадал гъанва. Иниз Яру ктабда гьатнавай гьайванар авайвиляй туристар къвезва.
Дербентдин мэр Рустамбег Пирмегьамедова туриствилин сезондиз шегьер гьикI гьазур жезватIа суьгьбетна. Ада къейдна хьи, шегьердин властри шегьер туристар кьабулиз гьазур хьунал гуьзчивалзава. Складра недай продуктар ава, паркара ва скверра аваданламишунин кIвалахар кьиле тухузва.
«Лезги газет»
