Мукьвара Ахцегь райондин Хкемрин хуьруьн мискIинда Мугьаммад Пайгъамбардин гьуьрметдай хуьруьн жемятдин еке мавлид-садакьа гана. Къейд ийин хьи, ихьтин мярекатар Ахцегьрин, Калукрин, Луткунрин хуьрерин мискIинрани кьиле тухвана. Мярекатда Дербент шегьердин “Бабуль-Абваб” мискIиндин имам, шейх, устаз Исамудин гьажи Саидова, РД-дин Кьиблепатан районрин имамри, Дербентдин Исламдин университетдин ректор Ариф гьажи Саидова, Тажикистандай атанвай шейх Хуршид-Мурад гьажиди, Ахцегь райондин имамрин Советдин председатель Абдулашим гьажи Абдулгьашумова, хуьруьн жемятди иштиракна.
Мярекат ачухдайла Абдулашим гьажи Абдулгьашумова Хкемрин жемятдиз мавлид мубаракна ва гаф Дербент шегьердин “Бабуль-Абваб” мискIиндин имам Исамудин гьажи Саидоваз гана. Ада мавлидрихъ еке метлеб авайди тестикьарзавай гьадисар рикIел хкана, Мугьаммад Пайгъамбарди , адан асгьабри Ислам дин вилик тухвай жуьрейрикай, террористрихъ галаз женг чIугунин важиблувиликай суьгьбетна. Имамди инсанриз гьуьрмет авун ва жуваз писвалзавайдазни хъсанвал ийиз алахъун чарасуз тирди къейдна ва и месэладиз талукь са гьадисни ахъайна.
Мугьаммад Пайгъамбар капI ийиз мискIиндиз фидайла са чувуд дишегьлиди гьар сеферда куьчедиз чиркин ятар, кьацIай шейэр гадардай. И карни дишегьлиди кьасухдай ийизвай… Амма Пайгъамбарди адаз са гафни лугьузвачир, акси яз, гьуьрмет авунин рекьерихъ къекъвезвай. И кар аквазвай адан асгьабри, сабур хуьз тахьана, адавай хабар кьуна: “Я Мугьаммад Пайгъамбар , гьар сеферда капI ийиз мискIиндиз фидайла, чувуд дишегьлиди вун элячIзавай рекьиз чиркин ятар язава, амма вуна адаз гьуьрметзава. Вучиз вуна икI ийизва?” “Вучиз лагьайтIа, зун Пайгъамбар я, заз Аллагь-Таалади гьамиша дуьз рекьел хьун эмирнава. Гьавиляй вири зи уьмметдини и кар фикирда кьун лазим я. А дишегьлиди вичин пис къилих гадар тавурла, за зи хъсанвал, сабурлувал гадардани?” — лагьана ада.
Гуьгъуьнлай Хуршид-Мурад гьажиди тажик чIалал мавлиддин бейтер кIелна ва иштиракчийри санал нисинин капI авуна. Къейд ийин хьи, мавлиддиз атай вирибуруз садакьани гана. Къуй Аллагьди кьабулрай!
Рагьидин Эминов
