Алай йисуз Дагъустанда цIийи 18 мектеб эцигда. Идакай РД-дин образованидин ва илимдин министрдин везифаяр вахтуналди тамамарзавай Ширали Алиева хабар гана.
“Федеральный программаяр кьилиз акъудунин ва республикадин инвестициядин программадин сергьятра аваз республикада мектебра кIелзавай аялар патал цIийи 5834 чка арадал гъида. И карди пуд мектебда пуд сменада кIвалахун ва вад объектда авай аварийный гьалар арадай акъудиз куьмекда. ТIям акакьдай ва ерилу образованидал таъминарун республикадин руководстводин вилик акъвазнавай кар алай месэлайрикай сад я.
18 мектеб эцигун патал финансар чара ийидай чешмеяр тайинарнава. Амма 18 мектеб эцигун къазанмишна кIанзавай нетижадин са пай я. Алай вахтунда республикадин руководстводи мектебра пуд сменада кIвалухун арадай акъудун патал пулдин алава такьатар жеб авунин жигьетдай кIвалах кьиле тухузва…”, — лагьана Ширали Алиева.
Ада гьакIни къейд авурвал, алай йисан февралдин эхирдалди 3956 аялди кIелунар цIийи ирид мектебда давамарда. Абур кардик кутуни муьжуьд мектебда пуд сменада кIвалахун ва кьве мектебда авай аварийный гьалар арадай акъуддай мумкинвал гуда.
«Лезги газет»
