8-ноябрдиз РФ-дин Президент Владимир Путина яшайишдинни экономикадин рекьяй вилик финин месэлайриз талукьарнавай совещание кьиле тухвана. “Российская газета” изданиди хабар гузвайвал, мярекатдин сергьятра аваз уьлкведин регьберди игьтияж авай хизанриз гудай цIийи пособидикай малумарна.
ЦIийи пособие 2023-йисан 1-январдилай къуватда гьатда ва ам 17 йисан яшдив агакьдалди аялар авай хизанриз гудайвал я. В.Путинан фикирдалди, са куьнизни килиг тавуна, игьтияж авай, аялар чIехи жезвай хизанриз куьмекар гунин жигьетдай цIийи къурулуш кардик кутада.
РФ-дин зегьметдин ва яшайишдин рекьяй хуьнин министр Антон Котякован гафаралди, цIийи пособидин юкьван кьадарди вацра тахминан 13,9 агъзур манат тешкилда.
ЦIийи пособие гун патал, санлай къачурла, 1,7 триллион манат пул чара ийида. РФ-дин Гьукуматдин Председателдин заместитель Татьяна Голиковади хабар гайивал, пулунин такьатрин чIехи пай (1,4 триллиондилай виниз) федеральный бюджетдай ахъайда.
РФ-дин финансрин министр Антон Силуанова къейд авурвал, цIийи пособие гун патал мукьвал тир пуд йисуз бес жедай кьван такьатар бюджетдин проектдик кутунва.
Совещанидин сергьятра аваз В.Путина къейд авурвал, диде-бубаяр кIвалахал экъечIун себеб яз абуруз пособияр гун акъваз жезва. Гьа са вахтунда хизандиз къвезвай къазанжидин кьадар гъвечIиди яз амукьзава. Ада уьлкведин гьукуматдал ихьтин дуьшуьшар арадай акъуддай рекьер жагъурун тапшурмишна.
Къейд ийин хьи, къведай йисалай кардик акатзавай пособие гьихьтин шартIар фикирда кьуна гудатIа гьелелиг малум туш. Абур тайин хьанмазди, чна газетдай хабар гуда. Гьелелиг чизвайди цIийи пособие игьтияж авай ва чпе 17 йисан яшдив агакьдалди аялар чIехи жезвай хизанриз чара ийида.
Чи мухбир
