21-23- февралдиз  республикадин меркезда  регионрин уртах  “ТРАНСПОРТ. ЛОГИСТИКА. СВЯЗЬ 2019” выставка кьиле фида.  Адет хьанвайвал, выставка Махачкъаладин Р.Гьамзатован тIва­рунихъ галай  Милли библиотекадин дараматда ачухда.

Къейдна кIанда хьи, “ТРАНСПОРТ. ЛОГИСТИКА. СВЯЗЬ 2019” выставка республикада сифте сеферда яз кьиле тухузва. Ам тешкилунин карда выставкайрин “АНЖИЭКСПО” компаниядиз РД-дин Гьукуматдин, транспортдин ва рекьерин майишатдин, гьакIни информатизациядин, алакъадин ва массовый коммуникацийрин министерствойри, карчивилин  ва инвестицийрин рекьяй Агентстводи, РД-дин алишверишдинни промышленный палатади куьмек гузва.

Выставкадиз гьазурвал акун гьикI кьиле физватIа, гьихьтин компанийри ва карханайри  чпиз иштиракиз кIанза­вайдакай малумарнаватIа, гьадакай ва мярекатдиз талукь са жерге маса месэлайрикай арбе юкъуз республикадин журналистрихъ галаз “Дагъустандин правда” газетдин майдандал кьиле фейи пресс-конференциядал  “АНЖИЭКСПО” компаниядин генеральный директор Мукаил Исмаилова суьгьбетна. Пресс-конференцияда гьакIни РД-дин информатизациядин, алакъадин ва массовый коммуникацийрин министрдин сад лагьай заместитель Бадрудин Мегьамедова, РД-дин ТПП-дин вице-президент Александр Шевченкоди ва выставкайрин отделдин руководитель Гуьлпери Гьамзатовади иштиракна.

Малум тирвал, Дагъустандин мул­кунал траспортдин са жерге важиблу рекьер туькIуьрунин кIвалахар активнидаказ кьиле тухузва, Махачкъаладин гьуьлуьн международный порт ва  аэропорт  алай аямдин истемишунрив кьадайвал цIийикIа туь­кIуьр хъийизва, логистикадин центраяр арадал гъизва ва икI мад. Ибур ви­ри алишвериш вилик тухун, республи­кадин мулкунилай тухузвай метягьрин кьадар артухарун ва и карда хатасузвал таъминарун,  транспортдинни логистикадин хилез ин­вестицияр желб авун ва международный кооперация виликди тухун, идахъ галаз алакъалу яз Дагъустандин тIвар международный транспортдин “Кеферпад-Кьиблепад» коридорда Россиядинни Каспийдин патав гвай уьлквейрин амадагвилин алакъаяр  мягькемарунин карда ихтибар ийиз жедай иштиракчи яз раиж авун патал ва икI мад кьиле тухузвай кIвалахар я. Тран­спортдин къурулуш вилик финин дережадихъ галаз региондин экономика сихдаказ алакъалу я.

“ТРАНСПОРТ. ЛОГИСТИКА. СВЯЗЬ 2019”  выставка агъадихъ галай разделрикай ибарат жеда:

Санай масаниз тухудай такьатар:  автодорожный, авиациядин, гьуьлуьн ва вацIарин, ракьун рекьин, коммунальный, промышленный  транспорт.

Транспортдин ва адахъ галаз ала­къалу къуллугъар: пассажирар ва пар тухун, экспресс ва курьервилин почта, таможнядин къуллугъар, финансрин къуллугъар ва лизинг, транспортдин такьатар ремонт ва абуруз къуллугъ авунин кIвалахрин жерге, санай-масаниз тухунин хатасузвал.

Автотранспорт ва запчастар маса гун.Страхование. Навигациядин ва мониторингдин системаяр. Логистикада информациядин технологияр ва коммуникациядин такьатар. Модульный системаяр. Телематический системаяр. Транспортдин ва логистикадин алакъа­дин  хиле илим ва образование. Акьуллу шегьер. Телекоммуникациядин тадаракар, технологияр,  къуллугъар. Радиоалакъа. Мобильный алакъа. Ала­къа­дин кабелар, тадаракар. Искусственный интеллект. IT-къуллугъар ва икI мад.

Мукаил Исмаилова малумарайвал, выставкадал транспортдихъ ва логистикадихъ галаз алакъалу вири месэлаяр веревирддай мумкинвал ава. “Ала-къа” разделдик кваз ачухнавай экспозициядин сергьятра аваз неинки  теле- ва радиокоммуникацийринни IT-хилера цIийи жуьредин технологийрихъ галаз таниш жез, гьакIни амадагрихъ галаз тIал алай месэлаяр веревирд ийиз, садавай масадан  тежрибадикай менфят къачуз, карчивилин алакъаяр тайинариз жеда.

“Чна  IT месэлаяр гьялдай вирида­лайни хъсан къайдаяр са майдандал кIватIда: гележегдин технологияр ва къенин йикъан кIвал ва офис, гьар йи­къан яшайиш  патал важиблу цIийи­вилер. Инал зун вири жуьрейрин ала­къайрин такьатрикай ва къурулушрикай, телекоммуникацийрикай, операторрин къуллугърикай, гьакIни  интернет-провайдеррин къуллугърикай — web-хостингдикай, web-сервисар арадал гъуникай ва абурун кIва­лах дурумлудаказ кьиле тухуникай, web-дизайндикай рахазва. Ибур вири чи республикада выставкадин сергьятра аваз сифте яз майдандиз акъуд­завай месэлаяр я”, — къейдна “Анжиэксподин” руководителди.

М.Исмаилова  хабар гайивал, талукь тир икьраррал къулар чIугур­да­лай ­кьулухъ “ТРАНСПОРТ. ЛО­ГИС­ТИКА. СВЯЗЬ 2019” выставкадин генеральный спонсор Navion компания, официальный автомашин Hyundai тирди тестикь ­хьанва.

“Выставкадиз итиж ийизвайбурун кьадар гзаф я. И мярекат чна гъиле кьурдалай кьулухъ алатнавайди са гьафте ятIани, чаз маса регионрайни кваз зенгер ийизвайбурун кьадар къвердавай артух жезва. Выставка чна цIийи форматда аваз гьазурзава. Им “Анжиэкспо” компаниядин асул кьетIенвал я — чна вилик эцигнавай макьсад республикада международный дережадин выставкаяр тешкилун я.  И кар патал вири мумкинвилер ва такьатар желбзава, нетижа яз, чи выставкайрин иштиракчиярни рази яз амукьзава”, — алава хъувуна М.Исмаилова. Ада лагьайвал, къенин йикъалди чпиз выставкада иштиракиз кIан­завайдакай  Махачкъаладин аэропортуни, Гьуьлуьн алишверишдин  порту­ни, РЖД-ди, Россиядин Почтади, “Ме­га Транс” ва “Интерсвязь” компанийри  малумарнава.

Б.Мегьамедова телекоммуникацийрин хиле кьиле тухузвай кIвалах­дикай, гьакIни министерстводи итиж ийизвай “Михьи цав” ва “Акьуллу Дербент” проектрикай, абур кьилиз акъудунин нетижада хьун лазим тир дегишвилерикай лагьана.

Выставкадин программадик   транспортдин ва алакъадин хилериз талукь министерствойрин ва ассоциацийрин пешекаррин иштираквал аваз конференцияр, семинарар, бизнес-гуьруьшар, презентацияр кьиле тухун ква.

Выставкада иштиракиз кIанза­вайбурувай тамам делилар “АНЖИЭКСПО” ВК-дин  официальный сайтдай жагъуриз жеда: www.anjiexpo.ru. E-mail: info@anjiexpo.ru.

Жасмина Саидова