Аптекада

(Нубат къари-бадедал атана. Пенжердин а пата авай рушав ада са вили чар вугуда).

— Ма, чан руш, ина вуч кхьен­ва­тIа, зазни це.

— Ваз за гьи дарман гун, баде? Ви рецептда духтурди кхьенвайди “дермид- рол-фенолангид рум суспензия” я. Ам гьа ви вилик кваз куьтягь хьана. Ваз за “аргидрематоген — ацентригенал” гудани? Гьа кьве дармандин макьсадни сад я.

— Диагналарни генералар вучтинбур я, чан руш?

— Я баде, чахъ чи чIал авайди я. За лугьузва “дермид рол — фено­лан­гид рум суспенция” амач. Куьтягь хьана. Чахъ амайди “аргидрематоген — ацентригенал” я.

— Гьа…а…а…

— Вуч ийида, баде, гудани?

— Ам гьихьтин азардин дарман я, чан руш?

— Заз акьван кIвалах чидач! Ви гьи чка я тIазвайди?

— Вири, чан руш, вири: юкьни купулри кьунва, хуьрекдин кIвални тIазва, рикI-жигерни пайгардач, и мукьвара гарданда хундузни гьатнавалдай…

— Я баде!..  Ви вири тIазвани? Ваз духтурди кхьенвайди лацу тухулдин дарман я.

— ГьикI, чан руш? ГьакI хьайила, зи тухулни тIазва ман?

— Адалай къецяй ам къеняй иви фидайлани, ишлемишда.

— Вуч? Ивини физва?

— Тажуб жемир, баде. Зи вилик квайди ваз духтурди кхьенвай рецепт я. “Аргиндрематоген” гьакI ма­са чкаяр тIа хьайилани ишлемишда­.

— Я?! АкI хьайила, за сифте гьи азардин кIан пад цавалда? Са-сад хъвадани, тахьайтIа, капашдал чуь­кь­ведани?

— АкI ваъ, я баде. Йикъа пуд чIа­вал са-сад хъвадай адет я. Гьан, вучда, баде? Вуна “аргидрематоген — ацентригенал” къачузвани? Гзаф менфят авай дарман я, фикир квахьайла, туьтуьх атайла, кIвачер тIа хьайила… Гьан, уьчуьр ваз килигиз акъвазнава, баде.

— Къачу, баде, къачу! Чазни акьван вахт авайди туш. Куьтягь та­хьан­маз, къачу! — рахана гуьгъуьна авайбур.

— Мад вучда? Эгер куьмек гудайди ятIа, куьтягь тахьанмаз це заз, чан руш. Эцигда жуван кIвачерал. Яру яц ярузмаз рекьида, лугьуда халкьдин мисалда. Зазни зун сагъ аквазвай. Гьакъикъатда беден михьиз азарлу я… А-агь! Зун азарлу я, чан руш!.. Заз пис жезва!.. Аман, чан бала! Зун рекьизва! Ама…ан… Мес! Мес! (Са шумуд декьи­кьа­ди­лай аптекадин вилик тади куьмекдин машин атана акъатна).

Ибрамхалил  Рамазанов,

Дагъустандин халкьдин артист