Яргъалди чIугур залан азардикди и йикъара машгьур хирург, илимрин доктор, профессор, дуьньядин хирургрин ассоциациядин член, Нью-Йоркдин илимрин академиядин академик Салигь Пиралиевич Гьейбатов рагьметдиз фена.
С.П.Гьейбатов 1936-йисуз Докъузпара райондин Миграгъ-Къазмайрин хуьре дидедиз хьана. Миграгъа юкьван школа, Махачкъалада Дагъустандин госмединститут акьалтIарна (1958-йис).
Гьа са вахтунда вичин чирвилерни хкажна. Сифтедай Докъузпара районда, Мегьарамдхуьруьн кьилин санэпидемиологвиле, ахпа Избербашдин больницада жергедин духтур яз зегьмет чIугур жегьилди 1960-йисуз Махачкъаладиз хтана, вичи куьтягьай институтда дуьньядиз машгьур алим, профессор Р.П.Аскерханован гъилик илимдинни ахтармишунрин кIвалахар бегьемарна. 1971-йисуз илимрин кандидатвилин, 1985-йисуз докторвилин диссертацияр хвена. Алимди сифте яз инсандин чIулав лекьинин ва ивидин дамаррин азарар сагъарунин цIийи рекьер, жуьреяр теклифна. Хирургди сагъсуз, умудсуз хьанвай вишералди инсанриз цIийи уьмуьр ва умудар хгана.
Салигь Пиралиевичан илимдин кIвалахриз, адан цIийи теклифриз дуьньядин майданда виниз тир къимет гана. Алатай асирдин 90-йисарин эвелра ам винидихъ тIвар кьунвай академиядин академиквиле, Н.И.Пирогован тIварунихъ галай дуьньядин хирургрин ассоциациядин членвиле кьабулна. Алимдин илимдин хейлин кIвалахар (абур 300-лай гзаф я) дуьньядин гзаф чIалариз таржума авунва, абурукай илимда менфят къачузва. Ам жуьреба-жуьре шегьерра кьиле фейи международный са жерге конференцийрин иштиракчи тир.
Алимдин агалкьунриз чи республикадани виниз тир къимет ганва: ам “Дагъустан Республикадин илимдин лайихлу деятель” лагьай гьуьрметдин тIварцIиз, ЧIехи Петрдин медалдиз ва маса шабагьриз лайихлу хьана.
С.П.Гьейбатован тIвар “Россиядин лап хъсан хирургар”, “Дуьньядин хъсан 100 хирург” ктабра гьатнава. 1994-йисуз Дагъустандин телевидениди адакай фильм лентиниз къачуна.
Рагьметлудан хизанда вичелай гъейри мад 4 кас духтурар (уьмуьрдин юлдаш, кьве руш ва хва) ава. Хци бубадин рехъ давамарзава.
Чна, дериндай хажалат чIугунивди, рагьметлудан хизанриз багърийриз, мукьва-кьилийриз, ярар-дустариз, вири миграгъвийриз башсагълугъвал гузва.
Салигь Пиралиевичан экуь къамат чи рикIера амукьда.
“Лезги газетдин” редакциядин коллектив.
