И йикъара милли искусстводал, телевиденидални журналистикадал рикI алай вирибурув еке магьрумвал агакьна. Яргъалди тефей залан азардикди Дагъустандин халкьдин артист, машгьур чIагъанчи, СНГ-дин майданра кьиле фейи гзаф килигунринни конкурсрин гъалибчи, эхиримжи йисара “Дагъустан” РГВК-дай лезги чIалал тешкилзавай “Вахтар ва инсанар” тIвар алай программадин редактор, санлай вири чи милли чIаларин телепрограммайрин дирекциядин кьиле хьайи Савмудин (Исамудин) Мирземегьамедович Агьмедов рагьметдиз фена. Ам чидай вирибуру адахъ яс чIугвазва, сада-садаз сабурар гузва.
С.М.Агьмедов 1956-йисан 15-майдиз Кьурагь райондин Урсунрин хуьре дидедиз хьана. Гьеле аял чIавалай адан рикI милли музыкадал алай, гьавиляй ам хуьруьн школа акьалтIарнамазди Дербентдин музучилищедик экечIна (1972-йис), гьанайни музыкадин чIехи алемдиз гьахьна. Жуьреба-жуьре конкурсра, фестивалра, килигунра иштиракиз, адан тIвар, Дагъустанда хьиз, Бакуда, Ростовда, Москвада, Ивановода, Новосибирскда, Актауда, масанра машгьур хьана. И рекьери ам Азербайжандин машгьур музыкант, чIагъан ягъунин устад Афтандилазни мукьва авуна.
Вичин бажарагъди Савмудин Мирземегьамедович “Дагъустан” РГВК-диз гъана, ина яргъал йисара Милли алатрин ансамблдиз регьбервална, радиода ва телевиденида музыкадин программайриз редакторвална. Гьа са вахтунда заочно ДГПУ-дин филологиядин факультетни акьалтIарна.
2006-йисалай инихъ ам “Дагъустан” РГВК-дин редакторвиле, 2014-йисалайни милли телепрограммайрин дирекциядин руководителвиле тайинарна.
И дирекция ва милли программаяр арадал атуник адан еке пай ква. Телетамашачийриз ада халкьдин лап вафалу ва гьуьрметлу рухваярни рушар машгьурна, абурун кьегьал краралди акьалтзавай несилар халисан ватандашар, зегьметдал, уьмуьрдал, искусстводал ашукьбур яз тербияламишуниз къуват гана.
С.М.Агьмедован зегьмет адаз “РД-дин лайихлу артист” (1995-йис), “РД-дин халкьдин артист” (2003-йис) — гьуьрметдин тIварар, журналистикадин рекьяй “Дагъустандин къизилдин лекь” премия ва диплом, маса шабагьар гуналди къейдна. Адан рикIик яратмишдай крар, хуш майилар гзаф кумай. Амма ажал инсафсуз я.
Чна рагьметлудан хизандиз, мукьва-кьилийриз, санал кIвалахайбуруз, вири багърийриз башсагълугъвал гузва. Савмудин (Исамудин) Мирземегьамедовичан руьгьдин къамат чи рикIелай садрани алатдач.
“Лезги газетдин” редакциядин коллектив
