Къухмазов Рустам Нариманович Дербент шегьерда 1975-йисуз дидедиз хьана. Ам машгьур артистар хьайи Мурадхан ва Шамси Къухмазоврин сихилдай я. Школада кlелзавай йисарилай ам спортдал машгъул жезвай. Шегьерда юкьван школа акьалтlарна, “Юждаг” институтдин физкультурный факультетдиз гьахьна.
Ина кlелзавай йисара ада азаддаказ кьуршахар кьунай Кьиблепатан зонадин, Дагъустандин ва Россиядин шегьерра кьиле фейи чемпионатра ва турнирра иштиракна, кlвенкlвечи ва приздин чкаяр кьуна. Икl, 1999-йисуз адаз азаддаказ кьуршахар кьунай спортдин мастер лагьай тlвар гузва.
Институт акьалтlарай жегьил Дербентдин 19-нумрадин школадиз физкультурадай тарсар гуз кlвалахал акъваззава. Кьве йисалай Рустам Нариманович (2004-йисуз) шегьердин 11-нумрадин спортшколада тренервиле кlвалахал акъваззава ва спортдин акъажунра вичини иштиракзава. Ада спортдин бягьсерин цlийи жуьрейрай чирвилер къачуз башламишзава. Икl, ам аскеррин къайдада гъилералди кукlунин бягьсерин сирер чириз алахъзава. Азаддаказ кьуршахар кьаз чизвай, ушу-саньдадин сирерин гъавурда авай ам спортдин и жуьредай бягьсерин турнирдиз викIегьдиз экъечlзава. 2003-йисуз ам и жуьредай чемпионвилин тlварцlиз лайихлу жезва. Агалкьунри руьгь хкажнавай Р.Къухмазоваз 2004-йисуз контактный каратэдай Россиядин Кьиблепатан чемпионатда иштиракдай мумкинвал жезва. Инани кьегьал хци, женг четиндиз кьиле фенатlани, инанмишвилелди кlвенкlвечивилин чка кьазва. Къазанмишнавай агалкьунрай ам lll дандин чlулав чlулуниз лайихлу жезва.
— За тренервал ийиз гатlунна, — лугьузва Р.Къухмазова, — аялрин са десте кlватlна. Гьелбетда, кlвалах регьятди туш. Аялар вердишарун патал, жувахъ гьикьван агалкьунар аваз хьайитlани, муаллимвилин чирвилер, сабур, абур чпин мурадрихъ инанмишардай къуват кlанда. Аялрихъ галаз кlвалахдайла, и крарин гъавурда зун гьатнава.
2010-йисалай ада вердишвилер гузвай спортсменри турнирра, чемпионатра иштиракзава. Цlийи Къаракуьредин С. Керимован тlварунихъ галай спорткомплексда кlвалахзавай йисара ада жаванриз къайдаяр авачир бягьсерай чирвилер гузвай. Ина кlвалахай йисар ада хушдиз рикlел хкизва: “Алатай асирдин 90-йисарилай эгечlна, къайдаяр авачир бягьсерай акъажунри, вири дуьньядин сергьятра хьиз, Дагъустандани сейли чка кьаз эгечlна. Эвелдай азаддаказ кьуршахар кьун гегьенш тиртIа, гилан девирдин жегьилри спортдин цlийи жуьрейрин акъажунриз еке итиж ийизва. Ина кIвалахай вад йисуз заз акуна хьи, бажарагълу, чпин гележегдин камар чlехи рингдиз къачуз жедай жегьил пагьливанар ава. Зи гъилик чирвилер къачур хейлинбур — Алискеров Артур, Алискеров Самур, Амир Абасов, Агъарагьимов Саид, Керогълы Къаибов, Мегьамед Къурбанов, Осман Гьажимусаев ва масабур Дагъустандин, Россиядин ва дуьньядин чемпионар хьана”.
Какахьай текба-тек женгерай Италиядин Тоскана шегьерда хьайи дуьньядин чемпионатда къизгъин гьалара кьиле фейи бягьсина Алискеров Самура дуьньядин чемпионвилин тlвар къазанмишна, Саид Агъарагьимов 2-чкадиз лайихлу хьана.
Рустам Къухмазован гъилик къайдаяр авачир бягьсерай вердишвилер къачур 40 спортсмендикай — Россиядин, 25-дакай Дагъустандин, 6-дакай дуьньядин чемпионар хьанва. Им, гьелбетда, еке агалкьун я.
Эхиримжи кьве йисан кlвалахдин рекъемар гъин:
2020-йисан февралдиз Московадин областдин “Одинцово” спорткомплексда какахьай текба-тек женгерай кьиле фейи Россиядин чемпионатда адан гъилик чирвилер къачур Гьасан Гьасанов — 1, Фахрудин Исрафилов — 2 ва Ильяс Умаханов 3-чкайриз лайихлу хьана.
Декабрдиз микс-файтдай (бои без правил) Москвада кьиле фейи турнирда Керогълы Къаибова 1-чка кьуна, гран-придин турнирда иштиракдай путевка къазамишзава. Къейд авун лазим я хьи, К.Къаибов пудра дуьньядин кубокдин сагьиб, Европадин чемпион ва гьар жуьре международный турниррин гъалибчи ва гьакlни панкратиондай международный классдин спортдин мастерни я.
Дагъустандин хкягъай командадик кваз какахьай текба-тек женгерай турнирда адан тербиячияр тир Рамазан Байрамова (7-8 йис) ва Мугьаммадали Рамазанова (12-13 йис) 1-чкаяр кьуна.
Алай йисан февралдиз СБИ/Ориенталдай Москвада кьиле фейи Россиядин чемпионатда Мухтар Рабаданов, Магди Рамазанов ва Чапан Айвазов (гьарма вичин заланвилин дережайрай) пьедесталдин 1-чкайрал хкаж жезва.
Мартдин вацра спортдин микс-файт жуьредай Ульяновск шегьерда кьиле фейи Россиядин чемпионатда Далгат Маталиев гъалибчи жезва.
Спорт вилик тухуник лайихлу пай кутунай, гьакъисагъ зегьметдай, акьалтзавай несилдиз сагълам уьмуьр тухун кIанарунай, ватанпересвилин тербия гунай Рустам Къухмазован зегьмет цlудралди кубокралди, медалралди, гьуьрметдин грамотайралди, дипломралди ва чухсагъулдин чараралди къейднава.
Рустам Нариманович сифте вичи кlвалахай Дербент шегьердин 11-нумрадин юкьван школадиз хтана, алай вахтунда ана физкультурадин муаллим яз кlвалахзава. Ам тренервилин кlвалахдивайни къерех хьанвач, кьилдин касдин спортшколада какахьай текба-тек женгерай чирвилер гуз, 30 аялдикай десте кlватlна, зегьмет чlугвазва.
Р.Къухмазова вичин тренерар хьайи Саидагьмед Кантемироваз ва Омар Османоваз, гьакlни алай вахтунда чемпионатриз, турнирриз фидайла, вичиз куьмек гузвай Дагъустандин СБИ ММА/ориенталдай Федерациядин президент Бадави Гьасановаз сагърай лугьузва.
Рустам Къухмазован ихьтин агалкьунрал чна дамахзава. Къуй адан гъилик вердишвилер къачузвай жаван спортсменарни вини кукlушрив агакьрай!
Къагьриман Ибрагьимов
