Чи ватанэгьлияр — гьар сана
Москвада кардик квай лезгийрин федеральный милли медениятдин автономиядин (ФЛНКА) исполкомдин председатель Асрет Робертович Ибилкьасумов халкьдин милли месэлайрик, жегьилрихъ галаз алакъалу проектрик кьил кутазвай ватанэгьлийрикай сад я. Исятда вич алай къуллугъди адаз ихьтин крара мадни гегьенш камар къачудай, хъсан нетижаяр хкатдай кIвалахар гъиле кьадай мумкинвал гузва.
1994-йисан 19-декабрдиз Мегьарамдхуьруьн райондин Тагьирхуьр-Къазмайрал дидедиз хьайи Асрет Ибилкьасумова хайи хуьруьн мектеб куьтягьайдалай кьулухъ дерин чирвилер къачунин макьсад вилик эцигна. И гьевесдин лепеди ам меркездиз акъудна — 2012-2016-йисара ада Москвада кардик квай чиликай менфят къачунин крар къайдада тунин рекьяй гьукуматдин университетдин (Государственный университет по землеустройству) “Землеустройство и кадастры” факультетда “Управление недвижимостью” пешедай кIелна. 2014-2017-йисара ада и вуздин военный кафедрадани (инженервилин кьушунар) очнидаказ чирвилер къачуна. Ина ада 2014-2018-йисара кьилин образование авайбуру чпин чирвилер артухардай махсус факультетда юриспруденциядин хиляйни заочнидаказ кIел хъувуна. 2018-йисуз ада вузда “Землеустройство и кадастры” факультетда эвелдай чирвилер къачур пешедай магистратурани акьалтIарна.
Ам гьеле аялзамаз чирвилер къачуниз майилвал ийиз вердиш хьана. Жемиятдин кIвалахривни ам студент береда эгечIна. Вичи чирвилер къачур университетда кардик хьайи вири халкьарин дуствилин клубдин председателвал авуна. Гурарин кIарарай яваш-яваш виниз хкаж жедай тегьерда чанда жегьт авай жегьил пешекар жемиятдин крариз мадни мукьва хьана; са шумуд йисуз ада РКНК-да (Российский конгресс народов Кавказа) кьилин образованидин идарайрихъ галаз алакъалувилелди кIвалахунин хилен, гуьгъуьнлай гьа и тешкилатда жегьилрин крарин рекьяй проектрин комитетдин координатор яз зегьмет чIугуна.
Жегьилрин крарин рекьяй къазанмишай агалкьунрай, халкьарин арада ислягьвални баришугъвал мягькемаруник пай кутунай, гьукуматдин идарайрихъ галаз бегьерлувилелди кIвалахунай Асрет Робертовичав Москвадин Гьукуматдин, меркездин милли сиясатдин ва регионрин арада авай алакъайрин департаментдин, меркездин миллетрин кIвалин патай чухсагъулдин чарар агакьна. Жегьилрин крарин рекьяй федеральный агентстводин конкурсда гъалиб хьунни жегьил ватанэгьлидин еке агалкьунрикай я.
Жегьил пешекар ятIани, Асретахъ хейлин идарайра кIвалахунин нетижада хъсан тежриба хьанва. 2015-йисуз Москвада гьукуматдин эменни идара авунин федеральный агентствода са шумуд вацра тежриба кIватIна. 2016-2017-йисара ада “Московский городской университет управления” образованидин идарада проектрин рекьяй пешекарвиле кIвалахна. Гуьгъуьнлай РКНК-да кIвалахдайлани, ада жуьреба-жуьре проектар арадал гъана, абур уьмуьрдиз кечирмишна, форумра иштиракна. 2018-2019-йисара Москвада авай “ЭВАНС” ООО-да коммерциядин юзуриз тежедай мал-мулкдиз талукь департаментдин меслятчивилин къуллугъ кьилиз акъудна.
Мукьуф авай, кар кьетIунин рекьер жагъуриз алакьдай пешекарар гьар са тешкилатдиз, идарадиз герек я. 2019-йисалай Асрета ФЛНКА-да зегьмет чIугвазва. Ина ада сифтедай жегьилриз талукь кIвалахар вилик тухунин, гуьзчивилик кутунин везифаяр кьилиз акъудна. Са куьруь муддатда тешкилатчивилинни пешекарвилин ерияр къалурай ватанэгьлидин хиве ФЛНКА-дин кьиле авайбуру 2021-йисан январдилай мадни еке ва жавабдар везифаяр туна — ам милли медениятдин тешкилатдин исполкомдин председателвиле тайинарна.
Алатай йисара ада Кавказдин халкьарин медениятдин гьар йисан фестивалда, “Стха халкьарин союз” лишандик кваз кьиле фейи военный ва спортдин къугъунра, милли тIуьнар машгьурунин серенжемра, экономикадин, сиясатдин, динрин, медениятдин рекьерай кьиле фейи “элкъвей столрин” хейлин мярекатра иштиракна.
2020-йисан 7-ноябрдилай 15-декабрдалди ФЛНКА-ди онлайн къайдада Кавказдин республикайрин халкьарин арада кьиле тухвай “Гъалибвилин чIал” гегьенш конкурсни А.Ибилкьасумован гуьзчивилик кваз кьиле фена. Ана Дагъустандай, Чечнядай, Адыгеядай, Кабардино-Балкариядай, Кеферпатан Осетия-Аланиядай, Черкесиядай, гьакIни Москвадай хейлин чIаларин векилри иштиракна. Тафаватлу хьайи 55 касдиз ФЛНКА-ди дипломар, къиметлу савкьатар, рикIел аламукьдай ядигарар гана. Лезгийрин милли тешкилатди Сив хуьнин суварин сергьятра аваз Кьиблепатан Дагъустанда кьиле тухвай мергьяматлувилин серенжемарни Асретан регьбервилик кваз кьилиз акъудна.
Асрет Ибилкьасумов алай аямдин истемишунриз жаваб гузвай, вилик макьсадар эцигиз ва абур кьилизни акъудиз алакьзавай, жемиятдин кIвалахрин гъавурда авай, санал акъвазнавачир жегьил я. Ингилис чIални чизва. Азад вахт ада ктабар кIелуниз, спортдиз серфзава.
Чаз Асрет Ибилкьасумовахъ халкь паталди тир жавабдар кIвалахра мадни еке агалкьунар хьана кIанзава.
К.Ферзалиев
