Мегьарамдхуьре Абрек Гьажиеваз бахшна волейболдай рушарин арада районрин уртах акъажунар кьиле тухвана. Мегьарамдхуьруьн райондин администрациядин кьилин теклифдалди и акъажунра Кьиблепатан Дагъустандин районрин, шегьеррин ва хуьрерин командайривай иштиракиз жезвай. Администрациядин векилди къейдайвал, акъажунрин мана-метлеб жегьилар волейболдал желбун, Кьиблепатан Дагъустанда яшамиш жезвай халкьарин, чIехи жезвай несилдин арада дуствилин алакъаяр мягькемарун я.
Акъажунриз килигиз райсобранидин председатель Абубакар Ханмегьамедов, “Мегьарамдхуьруьн район” МО-да агьалияр кар-кеспидик кутунин центрадин директор Мавзедин Гьажиев, образованидин управленидин векилар атанвай.
Турнирда Мегьарамдхуьруьн, Кьурагь, Ахцегь, Сулейман-Стальский районрин ва Къуйсунрин, Советскийдин, Гилийрин командайри иштиракна. Сад лагьай чкадиз Кьурагь райондин, 2-чкадиз Къуйсунрин, 3-чкадиз Ахцегь райондин командаяр лайихлу хьана.
КIвенкIвечи чкаяр кьурбуруз къиметлу призар, кубокар, грамотаяр, медалар гана.
Дагъви Шериф
