И йикъара Дербент шегьердай тир летчик, майор Михаил Абраменкодиз (телеф хьайидалай кьулухъ) уьлкведин Президентдин Указдалди Россиядин Игит лагьай тIвар гана. Идан гьакъиндай РД-дин Кьил Сергей Меликова вичин телеграм-каналда хабар гана.
“Чи ватандашди Украинада кьиле тухузвай военный махсус серенжемда сифте йикъарилай иштиракзавай. Ка-52 маркадин вертолетдиз регьбервал гузвай майор 600 сеферда цавуз хкаж хьана, ада важиблу хейлин тапшуругъар кьилиз акъудна. Ам халис пешекар тир. Майорди Кеферпатан Кавказда кьиле тухвай терроризмдиз акси, ООН-дин гуьзчивилик кваз Чад государствода тешкилай ва гьакI Сирияда кьиле фейи гьерекатрани иштиракна.
Украинада Михаила душмандин 40-далай виниз техника тергна, чи аскерар саламат чкадиз ахкъудзавай вертолетар душмандин ягъунрикай хвена.
Михаилан багърийриз, мукьва-кьилийриз рикIин сидкьидай башсагълугъвал гузва. Чна жуьрэтлу майордин игитвилел дамахзава. Адан хизандин гьакъиндай чна къайгъу чIугвада. Игитдиз — баркалла!”, — кхьена Сергей Меликова.
«Лезги газет»
