“Мавел” чапханади и мукьвара майдандиз акъуднавай журналист, публицист, хъсан гьикаятчи Нариман Ибрагьимован “Чи тIал-квал” ктабда уьмуьрди къалурзавай бязи вакъиайриз, инсанрин крариз, амалриз къимет гузвай, кIелзавай касдин вилик яшайишдин тIалрайни хъутIалрай, татугай гьаларай, вилив хуьн тавур хьтин чIулав ккIарай экъечIдай рекьер-хуьлер ачухарзава.
Уьмуьр кьиле тухун гьикьван четин хьанватIа, чун вири шагьидар я. Чпел “викIегь” (“лихие”) тIвар акьалтнавай 90-йисарин вагьши “прихватизацияди” чи общество гьикI чукIурнатIа, адетдин уьмуьр тухузвай инсанар садлагьана жанавурризни хипериз гьикI элкъуьрнатIа, тарихда гьатнава. Савадлувилелай, культурадилайни илимлувилелай артух авамвални гъейратсузвал, акьалтIай вагьшивални келлегуьзвал, сада-садан мал тарашун, инсанвилиз кIур гун вилик акатнавайди садавайни инкариз жезмач.
Ихьтин гьалар аквазвай халисан ватанпересривай, абуруз къимет тагана, чпин фикирар раиж тавуна, акъвазиз жедайни?
Нариман Ибрагьимов, и йикъара вичин 70 йисан юбилей къейднавай тежрибалу журналист, публицист ва гьикаятчи девирдин тIалрани хъутIалра устадвилелди къекъвезва, дуьз рекьер-хуьлерни жагъурзава, хъсан теклифарни тIимил гузвач.
Ктабда гьатнавай “Хайи чилин яржар”, “ЯцIу гафарихъ яцIу крарни хьанайтIа”, “Жуван мал жуван цура кIанда”, “ЧIехи бубайрин хванахвайрин суракьда”, “Бейтерефвал ва я хаинвал”, “Кесиб культура”, “Терроризмдин барбатIвилер”, “Хер алай вак”, мадни гзаф макъалаяр гьакъикъи делилрал бинеламишна, михьи, верцIи лезги чIалал кхьенвай фельетонриз барабар эсерар я.
Абур саки вирибур чи газетдизни акъатнай. Санал кIватIайла, абурун тербиядинни чирвилер гунин тах са шумуд къат артух жезва.
Санлай абуру кIелзавайдаз девирдин тIалрайни хъутIалрай экъечIдай “илим” чирзава. Кьилинди, за гьиссзавайвал, инсанрин руьгь сагъариз, михьи ниятрихъ инанмиш жез куьмек гузва. Халисан публицистикадин женгчивални, гереквални, заз чиз, гьа инанмишардай къуватдикай ибарат я.
Ктабдин кьвед лагьай пай “Са куьлуь хъвер ая” лишандик кваз санал кIватIнавай куьруь къаравилийрикайни новеллайрикай, гьикаяяйрикайни риваятрикай ибарат я.
“Туба я, паб, туба я”, “Худа-Вердидин эмир”, “Тапан свас”, “Рушни хутах”, “Зун итим я”, “Яд кьурай булах”, “Буш кIатIан кьифер”, “Пишкешрин пишкеш”, “Къияматдин югъ”, “Рекьин юлдашар” ва масабур хушдаказ кIелиз жедай, чпихъ чпин сюжетар, эвел ва эхир авай художественный эсерар я.
Гьайиф чIугваз тазвай месэла ам я хьи, гьихьтин метлеблу ктабар кхьейтIани, чи аямдин “сагьибри” писателдинни публицистдин кIвалахдиз къимет гузмач. Хсуси пуларихъ чапдай акъудзавай ктабрин тиражар лап гъвечIибур, чапдай акъудунин ерини, иллаки орфографиядал, пунктуациядал, санлай грамматикадин нормайрал гьалтайла, агъузди жезва.
ЯтIани чи яратмишдай интеллигенциядин къуватар ксанвач. Абуру майдандиз цIийи-цIийи кIвалахар гъизва. Халкьдин руьгьдин культура хуьник чпин пай кутазва…
Мердали Жалилов
