Чи ватанэгьлияр — гьар сана
Чеб алай чка анжах хъсан, тарифлу краралди, кIвалахда къазанмишзавай агалкьунралди къалурзавай чи ватанэгьлияр Урусатдин хейлин шегьерра ава. Гьахьтинбурукай сад тир Измир Музафарович Гьасановахъ галаз и мукьвара зун таниш хьана. Малум хьайивал, алай вахтунда ам Москвада яшамиш жезва ва ана кардик квай машгьур вуздин рушарин футболдин хкягъай командадин тренервиле кIвалахзава.
Измир Гьасанов 1966-йисуз Мегьарамдхуьруьн райондин Бут-Къазмайрин хуьре муаллимдин хизанда дидедиз хьана. 1984-йисуз мектеб куьтягьна, Даггоспединститутдин физкультурадинни спортдин факультетдик экечIна. Спортдиз ада гъвечIи чIавалай майилвалзавай.
Кьвед-пуд вацра кIелайдалай кьулухъ адаз армиядин жергейриз эвер гана. Ада Удмуртиядин Воткинск шегьерда 1984-1986-йисара къенепатан кьушунра вичин буржи тамамарна. Къуллугъ кьилиз акъудна хтайла, институтда кIелунар давамар хъувуна. Спортда адахъ иллаки футболдал къугъунай еке алакьунар авай. 1988-йисуз Измир Махачкъаладин футболдин “Динамо”, гуьгъуьнлай и шегьердин “Сокол” командайрик кваз къугъвазвай. Пешекар футболистди гележегда и рекьяй тренервилин кIвалахдал машгъул хьун кьетIна. Вуз куьтягьай 1990-йисуз ам Махачкъаладин Маркарован тIварунихъ галай а чIаван ДЮСШ-да футболдин тренервиле кIвалахал акъвазна.
Измир Гьасанов Москвада аваз 16 йис я. Алай вахтунда ада ана К.Тимирязеван тIварунихъ галай РГАУ-да (Российский государственный аграрный университет) рушарин командадин тренервиле кIвалахзава. Сифтедай са йисан муддатда ада вуздин студентрикай — гадайрикай ибарат команда хъсан дережадиз ахкъудна. Гуьгъуьнлай алакьунар авай тренердиз рушарин командадихъ галаз кIвалахун теклифна. КIвалахдин нетижалувал са тIимил чIавалай командадихъ хьайи агалкьунри успатна. Москвада чапдай акъатзавай “Тимирязевка” газетда чи ватанэгьлидин регьбервилик квай футболдин командадин агалкьунрикай мукьвал-мукьвал макъалаяр чапзава. Малум хьайивал, университетдин рушарин хкягъай командади адан гьунарар вилив хуьзвайбур гьар сеферда шадарзава.
“Измир Музафаровича чи вилик гьакъикъи макьсадар эцигзава. Адалай командадик гъалибвал къачунин руьгь, гуьгьуьлар кутаз алакьзава. Къугъунра къазанмишзавай агалкьунарни сифте нубатда чи насигьатчидин-тренердин алахъунарни устадвал себеб яз арадал къвезва”, — лугьузва И.Гьасанован регьбервилик кваз вердишвилер къачузвай А.Костяковади.
Измир Гьасанова уьмуьрдин юлдашдихъ галаз санал кьве велед — рушни гада — чIехи авунва. 19 йисан яшда авай гада олимпиададин резервдин школада дзюдодал машгъул я.
Къуй чи ватанэгьлийрихъ гьар сана агалкьунар хьурай!
К. Ферзалиев
