30-мартдиз Дербентдин государстводин тарихдинни архитектурадин ва художественный музей-заповедникда «Ростелеком» компанияди ва музей-заповедникдин руководстводи 2020-йисуз ва алай йисан сифте кьиляй тамамарнавай кIвалахдин нетижайриз талукь пресс-конференция кьиле тухвана.
Пресс-конференциядин кlвалахда Дагъустандин милли чlаларал акъатзавай газетрин, журналрин, телеканалрин, информациядин къуллугърин журналистри, Дербентдин государстводин тарихдинни архитектурадин ва художественный музей-заповедникдин директор Виктор Чеснокова, “Ростелеком” ПАО-дин Дагъустанда авай филиалдин директор Руслан Ярагьмедова, Дербент шегьердин кьилин заместитель Видади Зейналова ва масабуру иштиракна.
Виктор Чеснокова республикадин журналистриз хабар гайивал, алай вахтунда “Ростелекомди” музейда рекъемрин къуллугърин комплекс кардик кутунва, саки 100 Мб/с зарбвал авай интернетдиз 18 чкадилай гьахьиз жезва. Шегьердиз къвезвай туристриз ва гьакlни чкадин агьалийриз интернетдин патахъай регьятвилер тешкилун патал кьве километрдин мензилдиз оптоволоконный линия тухванва. Нарын-Къеледа пулсуз интернетдиз гьахьиз жедай WI-FI кардик кутунва. Къеледин саки вири мулкуна мягькем сигнал кьазвай 7 роутер эцигнава. Ина гьакlни музейдин сайтдиз килигзавайбур патал 24 сятда музейдин мулкунал алай объектар гьакъикъи режимда къалурзавай 4 видеокамеради кIвалахзава.
Рекъемрин къуллугъдин бинедаллаз туькIуьрнавай дурумлу телеком-къурулушди культурадин объектдин кIвалах патал алава мумкинвилер ачухзава. Виктор Чеснокова къейд авурвал, карантиндин ва самоизоляциядин вахтунда чебни, къваларив гвайбурни тlегъуьндикай хуьн патал онлайн-къайдада музейриз ва выставкайриз фена. Онлайн-къайдада музейдиз мугьман хьайибурун кьадар 200 000 касдив агакьнавай.
Интернетдин цlийи мумкинвилерикай музейдин руководстводи алатай йисан ноябрдин вацра ЮНЕСКО-дин къаюмвилик кваз тухвай “Загадка крестово-купольного сооружения на территории крепости Нарын-Кала. История Христианства в Дербенте” международный конференциядал менфят къачуна. Зарбвал авай интернетди “Эрмитаждин” генеральный директор Михаил Пиотровскийдиз яргъал мензилда аваз и мярекатдин веревирдера иштиракдай мумкинвал гана. YouTub каналдин онлайн- къайдада и мярекатдиз 100 агъзурдав агакьна тамашачияр килигна.
Видади Зейналова къейд авурвал, интернетдин куьмек ишлемишуни дуьньядин аудиториядиз Дербентдин музейриз, халкьдин сеняткарвилериз, суварриз килигдай гегьенш рекьер ачухзава. Дербентвийризни и серенжемри чпин чирвилерин сергьятар гегьеншариз куьмек гуда. Гележегда кьилиз акъуддай цlийи проектарни фикирда ава. Абурук “Михьи цав”, “Рекъемрин экономика”, “Акьуллу шегьер”, гьакlни шегьердин куьгьне пай тир магьалрани зарбвал авай интернет тухун ква.
Руслан Ярагьмедова, вичин нубатдай, шегьердин администрациядихъ галаз санал “Ростелеком” компания и вири планар кьилиз акъудиз гьазур тирдахъ инанмишарна.
Къагьриман Ибрагьимов
