Са шумуд югъ идалай вилик Москвадин областдин Нарофоминск шегьерда азаддаказ кьуршахар кьунай Россиядин кIвенкIвечивал патал 18 йисал къведалди яшда авай жаванрин арада акъажунар кьиле фена. Ана чи уьлкведин 54 субъектдай тир 500-дав агакьна спортсменри иштиракна. Дагъустандин векилри 20 (кьилди къачуртIа, къизилдин — 7, гимишдин — 4 ва буьруьнждин — 9) медаль къазанмишна.
Шадвилелди а кардикай мадни хабар гуз кIанзава хьи, Россиядин кIвенкIвечивилин тIварар къазанмишайбурун жергеда машгьур спортсменар — чи халкьдин векиларни ава: мукьвара Чечнядин Грозный шегьерда СКФО-дин кIвенкIвечивал, Дагъустандин хкянавай командадик кваз иштиракдай ихтияр къазанмишай Рагьман Малагьмедов (110 кг-дал къведалди заланвал авайбурун арада), гьакI Москвадин патай экъечIзавай Алимирза Абдулкъадиров (92 кг-дал къведалди заланвал авайбурун арада) ва Агъаширин Агъаширинов (45 кг-дал къведалди заланвал авайбурун арада).
Уьлкведин жегьилрин арада кьиле тухузвай и акъажунрин кесерлувал мадни хкаж хьана. ГьикI хьи, UWW-дин (кьуршахар кьунай Сад хьанвай алем) бюроди и йикъара кьабулай къарардилай гуьгъуьниз чи уьлкведин командадини дуьньядин спортдин майданра кьиле фидай акъажунра иштиракда. Гила Россиядин спортсменри, гьа гьисабдай яз чи ватанэгьлийрини, Албаниядин меркез Тирана шегьерда июндиз кьиле фидай Европадин кIвенкIвечивал патал акъажунра иштиракда.
РикIел хкин: Рагьман Малагьмедован ери-бине Кьурагьай я. Ам Махачкъалада дидедиз хьана. Меркезда Олимпиададин резервдин 3-нумрадин спортшколада тренер Гьасан Абдубасирован гъилик вичин устадвал хкажзава. Азаддаказ кьуршахар кьунал машгъул жез са тIимил вахт ятIани, ада вичихъ алакьунар авайди къалурнава. Россиядин кIвенкIвечивал патал акъажунрин финалда адаз Осетиядай тир Вильям Валиев кумукьна.
Вичин ери-бине Белиждай тир Агъаширин Агъаширинова тренер Вагиф Къазиеван гъилик устадвал хкажзава. Россиядин кIвенкIвечивал патал акъажунра ада алатай йисузни 1-чка кьуна. ЦIи адаз Москвадай тир Эскендер Дагиров кумукьна. А.Агъаширинов республикадин, СКФО-дин дережада аваз кьиле фейи акъажунрани са шумудра кIвенкIвечи чкайриз лайихлу хьана.
Малум хьайивал, Алимирза Абдулкъадирован ери-бине Хив райондин Цлахъай я. Ам Дербентда дидедиз хьана. Алай вахтунда ада 10-классда кIелзава. “Компромисс” тIвар алай 10-нумрадин ДЮСШ-да жегьилди тренерар — Мирза Наврузован ва Вагиф Къазиеван гъилик устадвал хкажзава.
Алимирзадин буба Рамис Абдулкъадировични азаддаказ кьуршахар кьунай спортдин мастер я. Жавандин 7 йис тирла, ам, сифте яз, тренировкайриз бубади гъана. Алай вахтунда Рамис Абдулкъадирова винидихъ тIвар кьунвай ДЮСШ-диз регьбервал гузва. Ана 8 йисалай 18 йисалди яшда авай 400-лай виниз жаванри вердишвилер къачузва. Чаз Рамис Абдулкъадировичан тIалабунни кьилиз акъудиз кIанзава. ИкI, ада “Компромисс” ДЮСШ вичин хсуси такьатрихъ эцигай къурушви, меценат, Дербентда яшамиш жезвай Исмаил Шекералиеваз газетдин чинилай рикIин сидкьидай сагърай лугьун тIалабна. Гаф кватай чкадал лугьун хьи, гьа и спортзалда чи машгьур спортсменри — Даурен Куругълиева, Шамиль Мамедова ва масабуруни чпин устадвал хкажна.
Алимирзадихъ галаз давам хьайи суьгьбетдай малум хьайивал, алатай йисуз ада Дагъустандин, Москва шегьердин кIвенкIвечи лагьай тIварар къазанмишна. Россиядин кIвенкIвечивал патал акъажунра ам буьруьнждин медалдиз лайихлу хьана. Санлай къачурла, адахъ жуьреба-жуьре турниррани акъажунра къазанмишнавай 60-далай виниз медалар ава.
Россиядин кIвенкIвечивал патал акъажунра ада вири санлай 6 бягьс кьиле тухвана. Къейд авун лазим я хьи, 92 кг-дин заланвал авайбурун арада виридалайни гзаф, саки 40-дав агакьна, спортсменри иштиракна. Финалда адаз дагъустанви Мегьамед Гьасанов кумукьна.
Къуй чи ватанэгьлийрихъ спортдин рекье мадни еке кукIушар муьтIуьгъардай къуватар хьурай!
Рагнеда Рамалданова
