Са тIимил вахт идалай вилик Москвада грэпплингдай дуьньядин Кубок къазанмишун патал кьиле фейи акъажунра вичин ери-бине Кьурагь райондин Штулай тир Роберт Назаралиевани иштиракна. ИкI, 65 кг-дал къведалди заланвал авайбурун арада гъалибвал къазанмишуналди, ада какахьай жуьрейрай спортдин мастервилин тIвар къазанмишна. Идакай Кьурагь райондин сайтда хабар ганва.
Роберт 2001-йисан 26-сентябрдиз Штула дидедиз хьана. Хайи хуьре 7-класс акьалтIарай жаванди кIелунар КIирийрин юкьван школа-интернатда давамарна. Алай вахтунда ам Махачкъаладин политехнический колледждин 4-курсунин студент я.
Спортдал Р.Назаралиев 8 йисалай машгъул жезва. Школада кIелдай чIавузни ада боксдай райондин ва зонайрин, гьа гьисабдай яз Дагъустандин Кьиблепатан зонадин (ЮТО) чемпионвилин ва спортдин мастервиле кандидатвилин тIварар къазанмишна. Боксдай сифте тамам 3 йисуз жегьилди Расим Велиеван, гуьгъуьнлай Махачкъалада кьве йисуз “Юниверсал Файтер” спортклубда дуьньядин чемпион, шуьтруь рангунин чIулунин сагьиб Шарудин Адилгерееван, адалай кьулухъ кьве йисуз дуьньядин са шумуд сеферда чемпион, Бразилиядин ушу-джитсудай чIулав чIулунин сагьиб Заур Агьмедован регьбервилик кваз спортдин сирер чирун давамарна.
2018-йисуз Р.Назаралиева грэпплингдай — Къизлярда, 2019-йисузни Дербентда кьиле фейи Кеферпатан Кавказдин чемпионатра приздин чкаяр кьуна.
«Лезги газет»
