Чи ватанэгьлияр — гьар сана
1970-йисан 19-декабрдиз Москвада Советрин ва Россиядин театрдинни кинодин актер, РСФСР-дин лайихлу артист Расми Халидович Жабраилован лезги хизанда хьайи рушал Мадлен тIвар эцигна.
Меркезда мектеб куьтягьна, 1988-йисуз ам “актервилин искусство” пешедай Россиядин театрдин искусстводин академиядин (ГИТИС) режиссервилин факультетдик экечIна. Вуз акьалтIарай 1993-йисалай къедалди ам Москвадин “Мастерская П.Н.Фоменко” театрда артистка я. Мадлен Расмиевна кинойра ролрани къугъвазва. ИкI, ада иштиракзавай фильмайрин кьадар 40-далайни алатнава.
Искусстводин хиле къазанмишнавай агалкьунар себеб яз, 2004-йисуз Мадленаз РФ-дин лайихлу артиствилин тIвар гана. Вичин кеспидин рекье чIугвазвай зегьметдиз, алакьунриз килигна, ам гзаф кьадар премийризни лайихлу хьанва. 1998-йисуз адаз “Приключение” тамашада къугъунай К.Станиславскийдин тIварунихъ галай премия, 2000-йисуз “Варвары” тамашада къалурай актервилин бажарагъдай” — О.Табакован тIварунихъ галай премия, 2004-йисуз “Три сестры” тамашада иштиракунай “Чайка” махсус премия гана. “Три сестры” тамашада Наташадин ролда къугъунай Мадлен Расмиевнадикай 2005-йисуз “Московский комсомолец” газетди театрриз талукь яз тешкилай махсус премиядин сагьибни хьана.
А.Чехован “Три сестры” пьесадай П.Фоменкоди Москвадин театрда эцигай тамашада кьилин роль тамамарунай Мадлен Жабраиловадикай “Театрдин искусство” номинациядай 2007-йисуз Москва шегьердин премиядин лауреат хьана.
Эхиримжи йисара жуьреба-жуьре тамашайра, кинойра вичин еке бажарагъ къалурунай адаз ганвай цIудралди премийрин тIварар кьаз жеда.
Лезги актрисадихъ искусстводал рикI алайбурун арада еке гьуьрмет, нуфуз ава. Идан гьакъиндай интернетда кардик квай вири актерриз талукь махсус сайтда Мадлен Жабраиловадин бажарагълувилизни устадвилиз хейлин тамашачийри, адаз икрамзавайбуру кхьенвай разивилин келимайри шагьидвалзава.
“Къад йис идалай вилик уьлкведин кинематографди тамашачияр вичин алакьунралди гьейранариз тур Мадлен Жабраиловадихъ галаз танишарна. Са акьван яргъиди тушир муддатда адалай чи рикIера вичиз чка жагъуриз алакьна”, — кхьизва искусстводал рикI алай са ватандашди.
Чаз чи бажарагълу ватанэгьли Мадлен Жабраиловадихъ яратмишунра мадни зурба агалкьунар хьана кIанзава.
К.Ферзалиев
